Bu gün İranın Sistan-Bəlucistan vilayətinin Çabahar şəhərində törədilən terror aktı nəticəsində ölənlərin sayı 5-ə, yaralananlar isə 24 nəfərə çatıb. Yaralananlar arasında uşaq və qadınlar da var.

FaktXəbər "Mehr" agentliyinə istinadən bildirir ki, hadisə yerinə İran İslam İnqilabının Keşikçiləri Korpusunun quru qoşunları komandanı general Məhəmməd Pakpur da gəlib. O, bəyan edib ki, terror hücumunda ölənlərin sayı 2 nəfərdir. Yaralılardan isə yalnız birinin vəziyyəti ağırdır.

Terror aktına görə məsuliyyəti “Ənsar-əl Furkan” terror qruplaşması öz üzərinə götürüb.

***

11:31 - İranın Çabahar şəhərində bomba yüklü avtomobil partladılıb. FaktXəbər bildirir ki, bu barədə "Farsnews" agentliyi məlumat yayıb.

Hadisə polis qərargahının yaxınlığında baş verib. Partlayış zamanı 4 nəfərin öldüyü, 19 sakinin yaralandığı deyilir. Həyatını itirənlərdən biri polis serjantı Dariuş Rəncbər, digər isə əsgər Nasir Dürzadə olub.

"İSNA" informasiya agentliyi xəbər verir ki, partlayış intihar nəticəsində baş verib. Partlayışdan sonra silah səsləri eşidilib.