Analar üçün can rahatlılığı, atalar üçün məsrəf, uşaqlar üçün isə təhlükə… Söhbət uşaq bezlərindən gedir. Analar övladları üçün bundan günəlik istifadə edirlər. Amma bəzi hallarda uşaq bezlərinin körpələrdə problem yaratması onları narahat edir. Həkimlər körpələrə bezdən tez-tez istifadə etməyi məsləhət görmürlər.

Bildirilir ki, onların dərisi 2-3 yaşlarından formalaşmağa başlayır. Bu dövrə qədər dəri həssas olur. Bu dönəmdə körpələrin bezsiz saxlanması tövsiyə edilir. Çünki sintetik materildan hazırlanmış bezlər körpə dərisini qıcıqlandıra bilər. Mütəxəssislər bez islanarkən dərini quru saxlamaq qabiliyyətinə malik olması fikri ilə də razılaşmırlar. Onlar hesab edirlər ki, bez dəridə problem yaradırsa, deməli, tərkibində kimyəvi maddələr var.

Alimlərin araşdırmasına görə, bütün kağızabənzər məhsulların istehsalı zamanı xlorla ağardılan məhluldan istifadə olunur. Bu, məhluldan uşaq bezlərinə də vurulur. Nəticədə dioksin adlı zərərli maddə meydana gəlir ki, bu da körpənin sağlamlığını təhlükə altına qoyur. Dünya Səhiyyə Təşkilatı da istehsal olunan uşaq bezlərinə zərərli maddələrin hopduğunu bəyan edir. Bundan başqa, uşaq bezinin hazırlanmasında neft tullantılarından da istifadə olunması iddia edilir. Hətta uşaq bezlərinin tərkibində parafin maddəsinin olduğu bildirilir. Bəzən bu maddənin adı vazelin kimi də çəkilir. Hətta ondan kosmetika sahəsində geniş istifadə olunur. Bu maddə sidiklə kontakta girdikdə həssas körpə dərisində toksik şok deyilən fəsada gətirib çıxara bilər. Ona görə də gigiyenik sertifikatı olan məhsulları almaq məsləhət görülür.

Mütəxəssislər deyirlər ki, belə məhsullar adətən topdansatış mərkəzlərdə satılır. Ona görə də analar diqqətli olmalıdırlar. İlk növbədə körpəni 24 saat bezdə saxlamaq düzgün deyil. Uşaqların sidiyi saxlaya bilməməsində də bezdən mütəmadi istifadə başlıca rol oynayır. Mütəxəssilər deyirlər ki, xüsusi qaydalar var ki, buna mütləq əməl edilməlidir. Bez uşağın əyninə dar olmamalıdır. Xüsusən də oğlan uşaqları üçün bundan istifadə risklidir. Tibbdə də bezin istilik yaradan, hava keçirməyən xüsusiyyətini nəzərə alaraq, oğlan uşaqları üçün istifadəsi tövsiyə edilmir. Bəzi araşdırmalar göstərir ki, uzun müddət bezdə gəzən oğlan uşaqlarının cinsiyyət orqanı formalaşmadan geri qalır, yaxud da müəyyən problemlər yaranır. İngiltərə, Almaniya, Türkiyə kimi ölkələrdə pambıqdan, təbii parçadan yeni bezlər hazırlanır. Hansı ki bu bezlər körpənin sağlamlığını təhlükə altına qoymur. Hətta bir neçə dəfə yuyularaq istifadə oluna bilir. Belə bezlərin Azərbaycanda da istifadəsi uşaqların təhlükəsizliyi üçün vacibdir.

Bəs sizin uşaq bezi möcüzəsinin necə yaranmasından xəbəriniz varmı? Təbii ki, uşaq bezlərini ilk dəfə xanım icad edib. 1949-cu ildə sabun qıtlığının yarandığı bir vaxtda amerikalı qadın Marion Donoyan yenicə dünyaya gəlmiş  körpəsinin paltarlarını yuya bilmir. Vəziyyətdən çıxış yolu üçün duş pərdəsinin bir hissəsini kəsir, bez formasında altlıq tikir. Sonra bu materialın uşağı bişirdiyini və hava keçirmədiyini yəqin edib, paraşüt neylonundan istifadə etmək qərarına gəlir. Bezin ortasına isə pambıqdan xüsusi qat hazırlayır. Beləcə, yeni uşaq bezləri meydana gəlir. Marion bu bezlərin istehsalını genişləndirmək və getdikcə təkminləşdirmək qərarına gəlir. Nüfuzlu fabriklər əvvəlcə bez “möcüzəsi”nə inanmır, amma getdikcə tələbatın artdığını görüb bezlərin istehsalına başlayır. Beləliklə, getdikcə müasir formaya salınan bezlər dünyanın hər tərəfinə yayılır.