Türkmənistanda xalqın qara maşın alması və istifadəsi qadağan edilib. 

FaktXəbər-in məlumatına görə, bununla bağlı prezident Qurbanqulu Berdimuhammedov sərəncam imzalayıb.

Hökumət mənbələri qərarın prezident Berdimuhammedovun ağ rəngə sevgisindən qaynaqlandığını bildirir.

Hökumət, 2015-ci ildə də qara avtomobillərin idxalını qadağan etmiş, məmurlara da "uğur gətirdiyi" səbəbilə ağ avtomobildən istifadə etmək tapşırığı verilmişdi.

Bu sərəncamla 2018-ci ildən etibarən mülki vətəndaşlar da qara maşından istifadə etməyəcək, qara maşını olanlar isə onu yenidən rənglədəcəklər. Maşının yenidən rənglənməsi prosesi isə əvvəl 500 dollar olsa da, hazırda bu qiymət 1000 dollaradək bahalaşıb.

Qeyd olunur ki, artıq Aşxabadın "Yubiley" küçəsindəki dayanacaq tünd rəngli avtomobillərlə doludur. Avtomobillər polisin tələbi ilə evakuasiya olunub və faktiki olaraq həbs edilib. Avtomobil sahiblərinə ancaq o şərtlə qaytarılır ki, onlar avtomobilin ağ və ya açıq rənglə rənglənəcəyinə dair yazılı izahat verirlər.