“Bu ilin noyabr-dekabr aylarında Bakı şəhərində keçiriləcək müəllimlərin diaqnostik qiymətləndirməsində təxminən 3 minə yaxın müəllim iştirak edəcək”.

Bunu Bakı Şəhəri üzrə Təhsil İdarəsinin müdiri Məhəbbət Vəliyeva jurnalistlərə açıqlamasında deyib. M.Vəliyevanın sözlərinə görə, əvvəlki illərdə keçirilən diaqnostik qiymətləndirmədə müxtəlif səbəblərdən iştirak edə bilməyən və ya işə yeni qəbul edilən, 2016-2017-ci dərs ilində Təhsil Nazirliyinin keçirdiyi ölkədaxili yerdəyişmə müsabiqəsi nəticəsində işə qəbul olan, habelə cari dərs ilində müddətli əmək müqaviləsi ilə vakant və ya sosial məzuniyyət yerinə işə qəbul olan müəllimlər bilik və bacarıqların diaqnostik qiymətləndirilməsinə cəlb olunacaq. M.Vəliyeva bildirib ki, diaqnostik qiymətləndirmə müəllimlərin əmək haqlarının artırılmasına xidmət edir:

“Ötən illərdə Bakıda işləyən müəllimlərin təxminən 28 mini qiymətləndirilmədə iştirak edib. Hazırda qiymətləndirilmə üçün təşkilati işlər aparılır. Qiymətləndirilmənin dekabrın ayının əvvəlində keçirilməsi planlaşdırılır”. (Lent.az)