Azərbaycan İslam Partiyasının sədr əvəzi Elçin Manafov  Mübarək Ramazan bayramı münasibətilə Azərbaycan xalqını, dünya müsəlmanlarını təbrik edib.

Təbrikdə deyilir: Mən bu möhtəşəm və müqəddəs bir gündə Allahıma Həmd və Səna edirəm, zəmanənin İmamına və onun naibi olan müsəlmanların rəhbərinə salam və təbrikimi çatdırdıqdan sonra üzümü əziz və hörmətli xalqıma tutub belə ərz edirəm: Sevimli xalqım sizləri əzəmətli və ilahi gün olan mübarək Ramazan bayramı münasibətilə təmsil olunduğum Azərbaycan İslam Partiyası və əvəz etdiyim lider və partiya sədri Hacı Mövsüm Səmədov adından, eləcə də partiyanın bütün funksioner və üzvləri tərəfindən, sonunda öz adımdan səmimi-qəlbdən təbrik edirəm.

Arzu və istəyim xalqımızın xoşbəxt və gözəl gələcəyi, doğma vətənimizin, ana yurdumuzun əmin-amanlığı və xoş günlər görməsi, torpaqlarımızın tezliklə işğaldan azad olunması, dövlətimizin əzəmətli və qüdrətli, ölkəmizin müstəqilliyi və çiçəklənməsidir.

Allaha and verirəm öz əzəməti və qüdrətinə, bu müqəddəs günə və bayrama xatir tezliklə bütün dünyada sülhü bərqərar etsin, zülmü və zalımları aradan qaldırmaqla məzlumlara nicat versin, bütün işğal altında olan torpaqları, o cümlədən müsəlman torpaqları, xüsusilə də, əziz Qarabağımızı işğal və düşmən təcavüzündən azad etsin. Zindanda olan, məhbəs həyatını yaşayan bütün günahsız insanları, xüsusilə millətimizin ləyaqətli övladları, o cümlədən Hacı Mövsüm Səmədov, Hacı Abgül Süleymanov, Hacı Taleh Bağırov, Hacı Fəramiz, Ruhullah Axundov və başqaları tezliklə zindandan azad etməklə ailəsini, yaxınlarını və digər sevənlərini şad etsin. Qoy bu bayram sevinci bütün ailələrə nəsib olsun. İnanclı insanların, xüsusən də məğfirət və bağışlanmaq istəyən millətimizin və şəxsən özümün günahlarından keçsin. Bizləri Özünə layiqli bəndə və İmam Zamana layiqli xidmətçi qərar versin. Bir ay bizi qonaq etdiyi bu ilahi ziyafətdən nəsibini alanlardan üzüağ və mərhəmətinə şamil olanlardan qərar versin. Bizə göstərdiyi bu böyük mərhəmət və sonsuz nemətləri İmamın zühuru ilə kamil etsin.

Bütün zaman və hallarda bizə qarşı mehriban və mərhəmətli olduğu kimi bizlərə də mehribançılığı əta etsin. Öz mərhəmətindən də şamil etsin ki, biz də Onun kimi rəhm edib bağışlaya bilək. Bizlərə əməllərimizə ehtiyacı olmadığı halda, yaxşılıq etməyi ve saleh əməl sahibi olmağı nəsib etsin. Amin!