FaktXəbər-in verdiyi məlumata görə, bu gün Reportyorların Azadlıq və Təhlükəsizlik İnstitutunda Qarabağ əlili, jurnalist Məğrur Bədəlsoyun təşkilatçılığı ilə mətbuat konfransı keçirilib.

Məğrur Bədəlsoy «Əlillər evi»ndə yaşayanların problemlərini mətbuata açıqlayıb. Onun sözlərinə görə, binaya su gəlmir, hətta kanalizasiya sistemi yoxdur: "Qazı da tez-tez kəsirlər. Binanım qarşısında piyada yolu və keçid yoxdur". İş o həddə çaptıb ki,  Nəqliyyat Nazirliyinin qoyduğu dayanacaq da gecə oğurlanıb.

O, əlillərə və şəhid ailələrinə qarşı edilən ədalətsizlikdən söz açaraq, verilən güzəştlərin mənimsənildiyini vurğulayıb.

Bədəlsoyun bildirdiyinə görə, «Həyat» ticarət mərkəzi və Nabrandakı əlillərin istirahət kompleksi məmurlar tərəfindən özəlləşdirilib. O, adıçəkilən yerlərin ayrı-ayrı məmurlara xidmət etdiyini bildirib, həmçinin onlar üçün nəzərdə tutulan sanatoriya-kurort yollayışlarının, sığorta ödənişlərinin və digər sosial-tibbi prosedurların həyata keçirilmədiyini deyib.

Əlil və şəhid ailələri Nəqliyyat Nazirliyinə, Bakı Şəhər İcra Hakimiyyətinə, Nazirlər Kabinetinə dəfələrlə şikayətlər etsələr də onların problemlərinə əlac edənlərin tapılmadığını deyirlər. Onlat ölkədə əlillərə qarşı ayrı seçkikiyə etiraz əlaməti olaraq fevral ayının 8-də Bakıda mitinq keçirəcəklərini bildirib. Mitinq üçün Bakı şəhər İcra Hakimiyyətinə də müraciət olunacağı vurğulanıb.