2013 prezident seçkilərindən sonra, oktyabrın 24-də Azərbaycanda 3 nazirlik postu dəyişdirildi. Onlardan biri də Müdafiə Nazirliyidir.

Bildiyiniz kimi Azərbaycan qeyri-döyüş şəraitində olmasına baxmayaraq, hərbi xidmətdə əsgər ölümləri tez-tez baş verir. Səfər Əbiyevin vaxtında hərbi xidmətdə naməlum səbəblərdən övladlarının ölümü ilə bağlı heç bir nəticəyə gələ bilməyən şəhid ailələrinin bəzisi yeni müdafiə nazirinə ümidlə baxır; bəziləri isə düşünür ki, bütün məsələlərin həll olunması üçün nazir yox, hakimiyyət, rejim dəyişilməlidir.

Yeni nazir Zakir Həsənovun dövründə şəhid ailələrinin hansı addım atacaqları ilə bağlı onların bəziləri ilə əlaqə saxlayıb, münasibətlərini öyrəndik.

2010-cu ildə Daşkəsəndə  N saylı hərbi hissədə baş vermiş kütləvi qətliamda övladını itirən Bəyalı Əzizov noyabrın 14-ü Müdafiə naziri ilə görüşmək ehtimalı olduğunu dedi: “Oktyabrın 28-də bizim RATİ-nin ofisində tədbirimiz oldu. Bu tədbirdə bir çox məsələləri işıqlandırdıq. Bunlara daxildir: yeni nazirə müraciət, sosial problemlərin həlli, sığorta pullarının verilməsi və s. Digər məsələlər də gündəmə gəldi. Biz şəhid ailələri olaraq övladlarımızın naməlum səbəblərdən ölməsi və ya öldürülməsi ilə bağlı araşdırmalarda sona qədər israr edəcəyik. Bu gün də, sabah da bu mübarizədən əl çəkməyəcəyik. O ki, qaldı bizim yeni nazirə münasibətimiz, bu nazirləri dəyişməklə heç bir fayda olmayacaq. Bu mənim qəti fikrimdir.”

Şəhid atası Bayalı Əzizov yeni müdafiə naziri Zakir Həsənovla görüşməkdə israrlı olduğunu bildirdi: “Oktyabrın 28-də olan tədbirdən çıxandan sonra, bir neçə şəhid ailələri Müdafiə Nazirliyinə getdik. Orada nazir Zakir Həsənovla üzbəüz görüşmək istədiyimiz bildirdik. Düzdür, ilk başdan etiraz etdilər, sonra bildirdilər ki, bir neçə gün sonra zəng edin. Mən də daxil olmaqla, digər şəhid ailələri dedik ki, əgər nazirin özü ilə görüş mümkün olacaqsa, görüşəcəyik, əks halda heç birimiz nazirliyin digər nümayəndələri ilə görüşməyəcəyik. Bizim bu danışığımızdan sonra görüşlə bağlı nazirlik noyabrın 14-ə qeyd etdi. Əslində nazirlə görüşmək üçün xeyli şəhid ailələri var. Amma biz hesab edirik ki, görüşdə 4-5 nəfər də olsa kifayətdir. Görüşdə nəinki öz övladlarımızın öldürülməsi ilə bağlı cinayətlərin araşdırılması, həmçinin orduda olan özbaşınalıqlara, korrupsiyaya “dedovşin”ya son qoyulmasını da tələb edəcəyik.”

Sonda Bayalı bəy şəhid olmuş oğlu Elxan Əzizovun, əgər həyatda olsaydı, bu gün 24 yaşı tamam olacağını bildirdi.

 Daha sonra digər şəhid ailəsi ilə əlaqə saxladıq. 2011-ci ildə şəhid olmuş Elçin Kərimbəylinin atası Əli Kərimbəyli “Atəşkəs Qurbanları” ictimai təşkilatı adından yeni müdafiə nazirinə müraciət edəcəklərini dedi: “Onu deyim ki, bütün bu halların baş verməməsi üçün nazir yox, sistem dəyişilməlidir. Amma biz mübarizəmizi davam etdirəcəyik. Yeni nazirə isə təzə olduğundan heç nə deyə bilmərəm, amma heç bir müsbət nəticə də gözləmirəm. Azərbaycanda hələ bir general, nazir yoxdur ki, desin, mən şəhid atasıyam. Nə olursa, kasıblara olur”

Şəmkir rayon Yeni Həyat kənd sakini, şəhid Elşən Novruzovun anası  Səlbixanım Novruzova da yeni gələn nazirlə görüşmək üçün qeydiyyata düşdüyünü dedi: “Noyabrın 14-ü ola bilsin ki, nazir biz şəhid ailələrini qəbul etsin. Amma yeni nazirə qarşı mənim münasibətim hələ ki, yaxşıdır. Bir şəhid anası kimi istəyirəm ki, övladımın qanı yerdə qalmasın. Oğlumun ölümündə günahı olanların hamısının cəzalandırılmasını istəyirəm.”

Həkimlərin vurduğu iynələrdən və yanlış müalicələrdən çürüyərək ölən əsgər Eldar Novruzovun atası Qədir Novruzov  oğlunu öldürən həkimlərin gələn həftə həbs olunacağını bildirdi: ”Mənim oğlum Elşəni Hərbi Hospitalda ilk əməliyyat edən həkim Vasif Adıgözəlov olub.  O vaxt yazdılar ki, guya Hərbi Hospitalın həkimi Vasif Adıgözəlov həbs olunub. Ancaq o, həbs olunmamışdır. Oğlum hospitalda olanda digər həkimlərin vurduğu iynələrin nəticəsində orqanları çürüdü.  Bununla bağlı mən Ali Məhkəməyə qədər şikayət etmişdim. Lakin Ali Məhkəmə Apelyasiya Məhkəməsinin qərarını ləğv edib işi geri qaytarmışdı. Hazırda Apelyasiya Məhkəməsində bir aydan çoxdur ki, məhkəmə davam edir. İndi bazar ertəsi məhkəmədə hökm oxunmalıdır. Mən elə düşünürəm ki, həkim Vasif Adıgözəlov həbs olunacaq.   Ancaq istintaq müddətində Vasif Adıgözəlovdan başqa, oğluma zərərli iynə vuran həkimlərin  adı istintaqdan çıxarılmışdı. Hazırda bu da Apelyasiya Məhkəməsində araşdırılır. Yəqin ki, birinci gün cinayətkarlar həbs olunacaq. Amma mən yeni nazir Zakir Həsənova bütün bu olanlarla bağlı məktub göndərəcəm. Həm də ən dəhşətlisi o idi ki, oğlumun əsgərlikdən dönməsinə 2-3 gün qalmış öldürdülər”.

Nərgiz