"Bərdə, Xaçmaz, Qax və Şamaxı rayonlarının hər birində 1 ədəd 4 mərtəbəli 36 mənzilli, Goranboy, Tərtər, İmişli, Beyləqan və Ağdam rayonlarının hər birində 1 ədəd 6 mərtəbəli 54 mənzilli yaşayış binaları inşa olunur və həmin binaların cari ilin sonunadək istifadəyə verilməsi nəzərdə tutulur".

Bunu Yeni Azərbaycan Partiyasının saytına müsahibəsində Azərbaycanın əmək və əhalinin sosial müdafiəsi naziri Füzuli Ələkbərov bildirib. Azərbaycanın ərazi bütövlüyü və Konstitusiya quruluşunun müdafiəsi uğrunda döyüşlərdə fiziki sağlamlıqlarını itirərərək əlil olmuş vətəndaşların və şəhid ailələrinin mənzil-məişət şəraitinin yaxşılaşdırılması məqsədilə 1997-ci ildən 2012-ci ilin sonunadək Bakı şəhərində və respublikanın digər şəhər və rayonlarında 5 minə yaxın mənzil inşa olunaraq istifadəyə verilib.

1997-ci illə müqayisədə əlil və şəhid ailələri üçün inşa olunan mənzillərin illik sayı son illərdə 10 dəfəyə yaxın artaraq orta hesabla 700 mənzil təşkil edib. Belə ki, 1997-2003-cü illərdə ümumilikdə 850-ə yaxın mənzil tikilərək istifadəyə verilibsə, 2004-2012-ci illərdə 4 mindən çox mənzil inşa olunaraq əlil və şəhid ailələrinə təqdim edilib".

Nazirin sözlərinə görə, prezident İlham Əliyev müharibə əlilləri və şəhid ailələri üçün ölkəmizin müxtəlif şəhərlərində gözəl binalar tikildiyini, bu binalardakı mənzillərdə rahat yaşayış şəraiti yaradıldığını, binaların xarici görünüşünün də gözəl, şəhər arxitekturasına uyğun olduğunu və müasir üslubda tikildiyini qeyd edərək Qarabağ müharibəsi əlillərinin problemlərinin həlli üçün də ardıcıl işlər aparıldığını deyib. "Növbəti bir neçə il ərzində növbədə dayanan hər bir ailə gözəl mənzillərlə təmin ediləcək".

F.Ələkbərovun sözlərinə görə, indiyədək 3526 nəfər əlilə dövlət hesabına minik avtomobili verilib. "Cari ildə əlillərə təqdim edilmək üçün daha 280 ədəd minik avtomobili alınıb. İlk vaxtlar əlil vətəndaşlara "OKA" markalı minik avtomobili verilirdisə, sonralar ölkənin inkişaf dinamikasına uyğun olaraq, bu maşınları keyfiyyəti və rahatlığı ilə daha üstün olan "Slavuta" markalı, son illərdə isə NAZ-Lifan markalı avtomobillər əvəz edib".