Mübarək Ramazan ayı öz bərəkəti və rəhmətilə gəlib çatdı. Azərbaycan müsəlman xalqı da səbirsizliklə bu ayın gəlişini gözləyirdi.

Bu ayın gəlişilə əlaqədar bir çox müsəlman dövlətlərində televiziya və radio verlişlərində dəyişikliklər olunur. Artıq qonşu dövlətlərdə bu proqramlarla bağlı anonslar da verilir. Belə ki, Ramazan ayı boyunca əksər televiziya kanalları öz buraxılışlarına dəyişikliklər edərək, yeni Ramazan ayına həsr olunmuş verilişləri ilə tamaşaçıların xidmətinə gəlir.

Ramazan ayına daxil olduğumuz bir vaxtda, təəssüflər olsun ki, hələlik televiziya kanallarımızda belə bir hazırlığın işartıları görünmür. Bəs görəsən telekanallar ümumiyyətlə belə bir hazırlıqları nəzərdə tutublarmı? “Deyerler.org” bununla əlaqədar ölkənin aparıcı telekanallarından münasibət öyrənib.

Bu suallarla bağlı ilk olaraq ANS televiziyasına müraciət etdik. ANS televiziyasının rəsmisi Tural Bayramov bildirdi ki, Ramazan ayı ilə bağlı yeni verlişlər olacaq: ”Təbii ki, Ramazan ayı ilə bağlı verlişlər olacaq. Biz verlişlər haqqında məlumat verə bilmərik. Amma bir müsəlman ölkə kimi əlbəttə bu ayla bağlı verlişlər veriləcək”.

Yalnız gündəlik dualar və iftar, imsak vaxtlarının elanı ilə kifayətlənəcək ATV telekanalı hər hansı yeni veriliş nəzərdə tutmur. Teleradio Şirkətini proqramlar üzrə direktoru Tohid Əliyev bildirdi ki, başqa verlişlər nəzərdə tutlmayıb: “Biz imsak, iftar vaxtların və gündəlik duaları verəcəyik. Başqa bir veriliş nəzərdə tutulmayıb. Yemək verilişlərimiz də olduğu kimi qalacaq. Kim istəmirsə, oruc tutursa, baxmaya bilər”.

Xəzər televiziyasında adətən Ramazan ayı boyunca bir sıra verilişlərin şahidi olduğumuzdan növbəti sualımızı Xəzər Televiziyasına yönəltdik. Xəzər televiziyasından da bildirildi ki, yeni verilişlər təsdiq olunub, amma bu ayla bağlı yeni bir veriliş nəzərdə tutulmayıb: “Xeyir nəzərdə tutlmayıb. Bizdə bəzi yeni verilişlər açıldı, amma Ramazan ayı ilə bağlı xüsusi bir verliş nəzərdə tutlmayıb”, - deyə Xəzər Televiziyasının rəsmisi bildirdi.

Ramazan ayında televiziya olaraq hansı verlişlərin verilməsi nəzərdə tutulur deyə müraciət etdiyimiz növbəti telekanal İctimai Televiziya oldu. İTV-nin Yayım Şurasının üzvü Fuad Muradov bildirdi ki, Ramazan ayı ilə bağlı verlişlər olacaq. Amma hansı və nə mövzuda olması sual olaraq qaldı: “Ramazan bayramı günlərində təbii ki, nəzərdə tutulub. Həftəlik proqram tutlub təbii ki,olacaq”.