Azərbaycan Milli Elmlər Akademiyasının (AMEA) N. Tusi adına Şamaxı Astrofizika Rəsədxanasının direktor müavini Xıdır Mikayılov mediaya açıqlama verərkən qeyd edib ki, Ramazan ayının başlanmasını bildirən yeni ay iyulun 8-də gündüz saat 12.16-da görünəcək: “Astronomik təqvimlə həmin axşam niyyət axşamıdır, iyulun 9-dan isə orucluq başlayır.”

Onun sözlərinə görə, növbəti ay avqustun 7-də gecə saat 02.52-də təzələnəcək. Lakin hər il Ramazan ayının daxil olması ilə bağlı kifayət qədər anlaşılmazlıqlar yaşanır. Bu dəfə də hər il yaşanan tendensiyanın baş verəcəyini nəzərə alaraq, AMEA-nın açıqlaması ilə bağlı ilahiyyatçı alim Şahin Həsənli ilə əlaqə saxladıq. Sözü gedən məsələ ilə bağlı FaktXeber.com-a açıqlama verən ilahiyyatçı alim Şahin Həsənli bildirdi ki, elm araşdırmalarla ayın hərəkətini qabaqcadan müəyyən etmək mümkündür. Şəriətdə isə ayın gözlə görünməsinin şərt olduğunu bildirən ilahiyyatçı alim, “ ona görə də bəzi vaxtlar elmi hesablamalara uyğun olaraq ayın mövqeyi bəlli edilsə də, şəri nöqteyi nəzərdən doğru qəbul olunmur. Qafqaz Müsəlmanları İdarəsi də bu səbəbdən hər il bayram günlərinin iki gün keçirilməsini təklif edir.” – deyə bildirdi: ”Bir sözlə əvvəlcədən ayın qəti şəkildə görünüb-görünməyəcəyini demək doğru deyil.”