Elmar Məmmədyarov ATƏT-in fəaliyyətdə olan sədrinin xüsusi nümayəndəsi Andrey Deşitsanın başçılıq etdiyi nümayəndə heyətini qəbul edib.
 
XİN mətbuat xidmətindən FaktXəbər-ə verilən məlumata görə, görüşdə Ermənistan-Azərbaycan münaqişəsinin həlli, ATƏT-in fəaliyyətdə olan sədrinin Azərbaycana nəzərdə tutulmuş səfəri və ATƏT-in gündəliyində duran məsələlər ətrafında fikir mübadiləsi aparılıb.
 
Nazir Elmar Məmmədyarov Ermənistan-Azərbaycan münaqişəsinin həllinin uzanmasının regionda davamlı sülh və sabitliyin bərqərar olmasına əsas əngəl olduğunu vurğulayıb və münaqişənin həlli üçün əsas məsələ olan Ermənistan silahlı qüvvələrinin Azərbaycanın işğal olunub ərazilərindən çıxarılmasının vacibliyini diqqətə çatdırıb. Xarici işlər naziri Ermənistan siyasi rəhbərliyinin danışıqlar prosesində qeyri-konstruktiv mövqe tutduğunu bildirərək, ATƏT-in Minsk Qrupunun münaqişənin nizamlanması prosesində aktivliyinin artırılmasının vacibliyini qeyd edib.
 
Ermənistan tərəfinin Xocalı aeroportunun işə salınacağı ilə bağlı bəyanatlarına toxunan Elmar Məmmədyarov, qeyd edib ki, belə bir addım Çikaqo Konvensiyasının kobud surətdə pozulması demək olardı və bütün beynəlxalq qanunvericilik Azərbaycanın bu məsələdə tutduğu mövqeyin haqlı olduğunu əks etdirir.