FaktXeber.com-un verdiyi məlumata görə, yanvarın 1-dən dövlət rüsumlarında edilən dəyişikliklərlə bağlı qanun qüvvəyə minib.
Yeni qanunla məhkəmə iddiaları üzrə dövlət rüsumunun məbləği artırılıb. Belə ki, əvvəllər 110 manatdan az iddia üçün 3 manat, bundan çox üçün 20 manat ödənilirdisə, indi 500 manata qədər tələb üçün 20 manat, artıq məbləğə  isə 30 manat ödəniləcək.

Cərimə qoyuluşuna dair dövlət rüsumu isə indi 40 manat olub.

Daşınmaz əmlak əməliyyatları, vətəndaşlıq vəziyyəti aktlarının qeydiyyatı, viza sənədləşməsi, müqavilələrin notarial təsdiqi üçün dövlət rüsumu da artırılıb. Əgər əvvəl qohumlar arasında daşınmaz əmlakın özgəninkiləşdirilməsi üçün 7 manat ödənilirdisə, indi bu məbləğ 13 manatdır. Bakıdakı əmlak başqasına satılırsa, dövlət rüsumu 110 manatdan 200 manata qaldırılıb. Başqa şəhərlərdə isə dövlət rüsumu 44 manatdan 80 manata qaldırılıb.

Ad, soyad və ata adının dəyişdirilməsi üçün dövlət rüsumuna da dəyişiklik edilib. Artıq vətəndaşlar bu xidmət üçün 3 deyil, 10 manata ödəməli olacaqlar.