Yəqin ki, Zaur Ramazanovun son müsahibəsi ilə tanışsınız. "Xəzər Lənkəran"ın eks forvardı açıqlamasında ölkə futbolunda baş verən bəzi maraqlı məqamlara toxunmaqla yanaşı, futbolu nə üçün tərk etdiyini də qeyd edib. Ramazanov ehtiyatda qalmaqdan və ya birinci divizionda oynamaqdansa, elə karyerasını indidən başa vurmağın məsləhət olduğunu deyib. Ancaq onun son olaraq dediyi sözü kimə "atdığı" da müəmmalı olaraq qalır. Belə ki, Zaur Ramazanov son olaraq "Əvvəlkindən də yaxşı oynayardım. Sadəcə, özüm davam etdirmək istəmədim. Hər şeyin öz vaxtı var. Futbolu başıuca tərk etmək istədim" dediyi sözlər isə deyəsən, çox müzakirə olunacaq.

Bir müddət əvvəl "Komanda" qəzetində Mahmud Qurbanov haqda gedən yazıdan sonra futbolçunun "əsəbləşərək" qəzetə hücum etməsindən sonra çoxlarında bir fikir formalaşmışdı: futbolçularımıza söz demək  və məsləhət vermək olmaz. İndi ki, "məsləhət"i biz yox, futbolçunun özü verir. Çoxlarının dəli-dolu kimi tanıdığı Zaur Ramazanovun futbolu başıuca tərk etmək istəməsi Mahmud Qurbanova göndərilən bir ismarıc deyilmi?