Xəbər Lenti

İnfoqrafika

Arxiv

Yazar


Aqil Mehdi

28 Oktyabr

2009
2079
Bunun Azərbaycana heç dəxli yoxdur

Bu il dünyanın əksər ölkələrində yaşayış evlərinin qiymətində ucuzlaşma qeydə alınıb. Qlobal iqtisadi böhranın səngiməsinə baxmayaraq, dünya ölkələrində mənzillərin qiyməti ucuzlaşmaqda davam edir.

Son bir ildə yaşayış evlərinin qiymətində ən çox ucuzlaşma Latviyanın paytaxtı Riqada qeydə alınıb. "İqtisadi forum" jurnalının məlumatına görə, Latviyanın paytaxtında qiymətlər orta hesabla 59 faiz ucuzlaşıb. Daşınmaz əmlak bazarında ən çox ucuzlaşmaya məruz qalan növbəti ölkə Birləşmiş Ərəb Əmirlikləridir. Bu ölkədə evlərin qiyməti 50 faiz dəyərsizləşib. Bundan başqa, əmlakın qiyməti Estoniyada 30,8 faiz, Ukraynada 26,6 faiz, Sinqapurda 24,9 faiz düşüb.

Qlobal böhran şəraitində yaşayış evlərinin qiymətinin bahalaşdığı ölkələr də var. İl ərzində İsraildə evlərin qiyməti 8,4 faiz, İsveçrədə 5 faiz , Lüksemburqda isə 2 faiz artıb.

Azərbaycan barədə isə danışmağa belə dəyməz. Çünki biz dünyanın yeganə ölkəsiyik ki, iqtisadi inkişafdan ağızdolusu danışırıq, amma o inkişafı sadəcə binaların və yolların tikintisində görürük. Əhalinin güzaranında yox. Tikilən yüzlərlə yeni hündürmərtəbəli binalara baxmayaraq, qiymətlər günü-gündən artır.

Yəqin ki, Azərbaycanda mənim kimi yüzlərlə demirəm, minlərlə evə ehtiyacı olan gənc, özü də ailəli var. Görəsən bircə dəfə də olsun bizim ölkənin çox-çox hörmətli gənclər və idman naziri AZAD RƏHİMOV fikirləşibmi ki, onun işi idmandan əlavə, həm də əslində bu ölkənin gənclərinin problemləri ilə məşğul olmaqdır. Gənclərin problemləri təkcə İQRA çempionatı keçirmək, kiməsə DİPLOM verməkdən ibarət deyil. Məncə gənclərin problemi gənc ailələrin yaşayış tərzi ilə yaxından maraqlanmaqdır. Amma gəlin görək bizim hörmətli nazirimiz bircə dəfə də olsun bu problemi haradasa qaldırıbmı. "Parlaq Gələcək" təşkilatının sədri kimi məni həmişə Gənclər və İdman Nazirliyinin keçirdiyi tədbirlərə dəvət edirlər. Yaxşı yadımdadır, bir dəfə həmin tədbirlərin birində şəxsən Azad Rəhimov cənabları çıxış edib dedi ki, aeroport yolunda "Gənclər Şəhərciyi" salınacaq və həmin şəhərcikdə gənclərə, gənc ailələrə güzəştli şərtlərlə evlər veriləcək. Düzü çox sevindim. Və hətta bu sevincimi zəng eləyib təşkilatın digər ailəli üzvlərinə də çatdırdım, onları da sevindirdim. Amma çifayda. Azad Rəhimovun çıxışı elə o zalda da qaldı, yox qalmadı, divarlara hopdu. Ondan sonra nəinki aeroport yolunda, heç yerdə "GƏNCLƏR ŞƏHƏRCİYİ" tikilmədi. Birdən kimsə deyər ki, niyə yalan danışırsan, şəhərdən cəmi 7 km aralıda "Abşeron Gənclər Şəhərciyi" tikilib. Ancaq deməyəcək ki, onun Gənclər və İdman Nazirliyinə və onun hörmətli nazirinə heç bir aidiyyatı yoxdur. Çünki həmin şəhərcikdə burax gənclərə güzəştli mənzil verməyə, heç milli qəhrəmana da güzəşt yoxdur. 1-ci mərtəbədən 15-ci mərtəbəyə kimi evlərin qiyməti ən yaxşı halda 11.000 manatdır, özü də cəmi 36.6 kv.m-lik bir mənzil. Özü də o mənzil ki, sözügedən 36.6 kv.metrə o mənzilin balkonları, mətbəxi, hamamı və ayaqyolu da daxildir. Yerdə nə qaldı? Yerdə qaldı bir çürük qoz, daha doğrusu 4x5 bir otaq. Bax bu otaqda gənc ailə özü də yaşamalıdı, uşağını da böyütməlidi. Hələ o da mənzili ala bilsə. Hə, indi Azad Rəhimov gənclər üçün bir dənə də toplantı keçirsin və desin görək bu gün işi güclə tapan Azərbaycan gənci o evi nəylə almalıdır? Uzağa getmirəm, elə özümdən götürürəm. Ayda ailə gəlirimin 350-400 manat olduğunu nəzərə alıb, mən o evi necə əldə etməliyəm. Nəzərə alsaq ki, mən ayı 200 manata kirayədə qalıram, evdə də 6 və 7 yaşında iki uşaq böyüyür. Və hər gün o uşaqları ictimai nəqliyyatla, daha doğrusu Tağı Əhmədovun şəxsi metrosu ilə dərsə aparmaq lazımdır. Uşaqların ayrı-ayrı növbələrdə oxuduğunu nəzərə alıb gündə də 4 dəfə metroya minmək lazımdır. Bura əlavə edin gündəlik qidalanmanı, geyim-keçimi və sair və ilaxrı. Yerdə nə qaldı? Yenə bir çürük qoz, daha doğrusu bir yığın borc.

Hörmətli Azad Rəhimov! Bəlkə bir gənclər və idman naziri kimi mənə yol göstərəsiniz. Yol göstərəsiniz ki, azad, müstəqil Azərbaycan Respublikasının azad vətəndaşı kimi mən necə mənzil sahibi ola bilərəm.

Gərək bağışlayasınız, sizə bu cür müraciət etməyə məcbur oldum. Çünki yəqin bilirəm ki, digər nazirliklərdəki kimi sizin tabeliyinizdə olan nazirlikdə də göndərilən məktublar məktublar şöbəsində yatıb qalır. Və belə bir cavab gəlir: "Sizin məktub filan yerə çatmışdır."

Əgər suallarıma cavab vermək istəsəniz, nazirliyinizin "Gənclər təşkilatları ilə iş sektoru"nda əlaqə telefonlarımız və ünvanımız var.

Bölmənin digər xəbərləri


® 2009 FAKTXEBER.COM

Dərc olunan materialların mətninə görə, redaksiya heç bir məsuliyət daşımır.
Saytdakı materiallardan istifadə edərkən istinad zəruridir.


16-10-2019 13:21



  (+994 55) 786-96-84

  [email protected]

Valyuta.com

Рейтинг@Mail.ru