Fəzail Ağamalı: “Ölkədə radikal mövqedə duran müxalifət nümayəndələri, öz fəaliyyət istiqamətləri ilə bu görüşlərin baş tutmasının qarşısını alırlar”

Yusif Bağırzadə: “2003-cu il prezident seçkilərindən sonra ölkə başçısı İlham Əliyev bəyanat verdi ki, mən həm də müxalifətin prezidentiyəm. Faktiki bu müddət ərzində bir dəfə də olsun hakimiyyət və prezident tərəfindən bu görüş üçün hər hansı təşəbbüs göstərilməyib”

Daima siyasi analitiklər tərəfindən qeyri-demokratik ölkə kimi təqdim olunan Rusiya hakimiyyəti gözlənilməz addım atıb. Belə ki, Rusiya tarixində ilk dəfə olaraq prezident Dmitri Medvedev, qeydiyyatda olan və olmayan siyasi partiya və müxalif təşkilatlarının liderləri ilə bir araya gələrək ölkədə islahat aparmaq üçün onların dəstək nümayiş etdirməsini istəyib. Bəs Azərbaycanda belə bir görüşün baş tutması mümkündürmü? Mövzu ilə bağlı FaktXeber.com-a açıqlama verən Ana Vətən Partiyasının sədri Fəzail Ağamalı və AMİP sədri Yusif Bağırzadə maraqlı fikirlər səsləndirib.  

Rusiyada fəaliyyət göstərən siyasi partiyaların Dmitri Medvedevi prezident kimi qəbul etdiyini qeyd edən Fəzail bəy, “Hətta prezident seçkilərində ona uduzan və iştirak etməyən siyasi qüvvələr heç vaxt Dmitri Medvedevin legitimlik məsələsini gündəliyə gətirmirlər. Siyasi müxalifət ona prezident deyə müraciət edir”, - deyə bildirdi.

Belə olan halda onlar arasında bu və ya digər görüşlərin baş tutmasının mümkün olduğunu qeyd edən Fəzail bəy, “əgər Azərbaycan müxalifəti xalqın mütləq əksəriyyətinin dəstəyi ilə seçilən şəxsi qəbul etməyərək prezidentin legitimliyini özlərinə məxsus şəkildə izah etməyə çalışırlarsa, bunlarla hər hansı bir görüşün baş tutması mümkün deyil”,-deyə bildirdi. “Ona görə də ölkədə radikal mövqedə duran müxalifət nümayəndələri, öz fəaliyyət istiqamətləri ilə bu görüşlərin baş tutmasının qarşısını alırlar. ”

AMİP sədri Yusif Bağırzadə isə hakimiyyətin qeydiyyatdan keçən və defakto 18-20 ilə yaxındır ki, ölkədə fəaliyyət göstərən siyasi müxalifət partiyaların hamısı ilə bir araya gəlməsinin zəruri olduğunu bildirdi. “Bununla bağlı ilk öncə prezidentin öz təşəbbüslə çıxış etməlidir. 2003-cu il prezident seçkilərindən sonra ölkə başçısı İlham Əliyev bəyanat verdi ki, mən həm də müxalifətin prezidentiyəm. Faktiki bu müddət ərzində bir dəfə də olsun hakimiyyət və prezident tərəfindən bu görüş üçün hər hansı bir təşəbbüs göstərilməyib.”

Ölkənin kifayət qədər problemlərinin olduğunu qeyd edən Yusif bəy, problemlərin həlli üçün birgə fəaliyyət göstərməyin vacib olduğunu dedi. “Hakimiyyət mütəmadi olaraq bu görüşlərin keçirilməsindən çəkinməməlidir. Eyni halda siyasi müxalifət liderlərinin səsləndirdiyi fikirlər qanun halına salınaraq, qüvvəyə minməlidir. İctimaiyyətin fikirlərini səsləndirmək adı ilə “İctimai” kanal açıblar, lakin bir dənə də olsun, müxalifət nümayəndəsi telekanala dəvət olunmur. Hər bir partiyaya özünün fəaliyyəti istiqamətində şərait yaradılmalıdır. Artıq siyasi reformların həyata keçirilməsinin vaxtı gəlib çatıb. Bu islahatların gecikməsi ölkədə siyasi partlayışın əmələ gəlməsinə səbəb olacaq.”