Bəyanatda deyilir:

“1992- ci ilin fevral ayının 26- da erməni silahlı qüvvələri tərəfindən, Rusiya ordusunun 366- cı motoatıcı polkunun iştirakı ilə Azərbaycan Respublikasının   Xocalı şəhərinin dinc əhalisinin vəhşicəsinə və kütləvi qırğınından -   Azərbaycan xalqının  soyqırımı hadisəsindən 20 il keçir.  XX əsrin sonunda törədilən Xocalı qətliamı bəşəriyyətə, insanlığa qarşı çağdaş dövrdə törədilən ən ağır cinayətlərdən biri kimi erməni təcavüzkarlarının niyyətini, həqiqi mənəvi- əxlaqi- mədəni simasını, bəşəri dəyərlərdən və müasir mədəniyyətdən nə qədər uzaqda olduqlarını  bütün çılpaqlığı ilə ortaya qoyur.
  İctimai Palata təəssüflə qeyd edir ki, baş verməsindən 20  il keçməsinə baxmayaraq, Xocalı soyqırımı beynəlxalq aləm tərəfindən lazımi qiymətini almamışdır. Bu cinayəti törədənlər  haqqında hüquqi hökmlər  verilməmiş və hələ də cəzasız qalmaqda davam edirlər. İnsan həyatını ən ali dəyər kimi qəbul edən müasir dünyanın bu anti-bəşəri cinayətə qarşı susqun qalması  bağışlanılan və  başa düşülən deyil. İctimai Palata hesab edir ki, Xocalı soyqırımı hadisəsinin həqiqi qiymətini alması,  bütün dünyada genosid   cinayətlərinin önünə keçilməsi, genosid cinayətlərində təqsirli olan şəxslərin müəyyən edilib cəzalandırılması  sahəsində bəşəriyyətin apardığı mübarizənin gücləndirilməsi üçün fövqəladə əhəmiyyətə malikdir. 
  Azərbaycan xalqı Xocalı soyqırımını və Xocalı soyqırımı qurbanlarını öz tarixinin ən faciəli hadisələrindən biri kimi heç vaxt unutmur. Bununla birlikdə, İctimai Palata hesab edir ki,  bu soyqırımı hadisəsinin dünya xalqlarına və dövlətlərinə  tanıdılması, təqsirkarların cəzalandırılması, soyqırımı qurbanlarının xatirəsinin əbədiləşdirilməsi və onların sosial müdafiəsinin  hüquqi təminatlarını müəyyən edilməsi sahəsində lazım olan bir sıra zəruri tədbirlər həyata keçirilməmişdir.
  İctimai Palata bundan əvvəl qəbul etdiyi mövqelərdən və qərarlardan çıxış edərək  bir daha Xocalı soyqırımı  haqqında Azərbaycan Respublikasının xüsusi qanununun qəbul edilməsinin vacibliyinə diqqəti cəlb edir. Bu qanunda və onun icrası ilə bağlı sənədlərdə
  - Xocalı soyqırımına məruz qalmış  şəxslərə “Xocalı soyqırımı qurbanı” statusu verilməsi;
  - “Xocalı soyqırımı qurbanı” adının (statusunun) verilməsi  qaydaları, onların hüquq və imtiyazlarının müəyyənləşdirilməsi, o cümlədən, Xocalı soyqırımı qurbanlarına Azərbaycan Respublikası qanunvericiliyində   müharibə veteranı, müharibə əlillərinin malik olduğu sosial müdafiə imtiyazlarının aid edilməsi, Xocalı soyqırımı zamanı həlak olmuş şəxslərin və onların ailələrinin sosial müdafiə dərəcəsinə görə  şəhid və şəhid ailələrinin statusuna  bərabər tutulması;
- Azərbaycan Milli Məclisi və müvafiq icra hakimiyyəti orqanları,  Xocalı soyqırımı hadisəsinin beynəlxalq aləmdə tanınması, bu  cinayətin təqsirkarlarının beynəlxalq məhkəmə və ya tribunallarda mühakimə edilməsi üçün fəaliyyət göstərməsi;
 - Dövlət orqanlarının fəaliyyətinin əlaqələndirilməsini təmin edilməsi məqsədilə Xocalı soyqırımının tədqiqi və tanıtımı komissiyası və onun daimi işçi qrupunun yaradılması.
- Xocalı soyqırımı qurbanlarının xatirəsini əbədiləşdirmək üçün  Azərbaycanın Respublikasında xatirə abidələrinin qoyulması  və s. tədbirləri həyata keçirilməsi, Azərbaycan Respublikasında  fəaliyyət göstərən bütün təhsil müəssisələrində Xocalı soyqırımının    ayrıca dərs  mövzusu kimi öyrənilməsi kimi məsələlər öz həllini tapmalıdır.
  İctimai Palata Xocalı soyqırımında həlak olmuş soydaşlarımızın əziz xatirəsi qarşısında baş əyir və əmin olduğunu bildirir ki, Azərbaycan xalqı onların uğrunda həlak olduğu müqəddəs torpaqlarımızın azad olunması vəzifəsini mütləq yerinə yetirəcəkdir”.

Nicat Xaliqoğlu