HAKİMİYYƏTİN QARABAĞ YANAŞMASINDA CİDDİ PROBLEMLƏR VAR
Sülhəddin Əkbər: "Hesab edirəm ki, Azərbaycan bu istiqamətdə olan konsepsiyasını dəyişməlidir"
22-02-2012 / 15:16
Özünü qondarma Dağlıq Qarabağdakı erməni “dövlətinin” başçısı adlandıran Bako Saakyan “Armeniya” qəzetinə müsahibə verərkən qeyd edib ki, Qarabağ münaqişəsinin nizamlanmasında Azərbaycanla “qarşılıqlı güzəştlər” mümkündür. O, hansısa birtərəfli güzəştləri qeyri-mümkün hesab etsə də bildirib ki, Dağlıq Qarabağ “hakimiyyəti” heç vaxt kompromisləri inkar etməyib. Qondarma Dağlıq Qarabağ Respublikası ilə bağlı Azərbaycan tərəfinin hansısa qarşılıqlı güzəştlərə getməsi mümkündürmü?
Mövzu ilə bağlı FaktXeber.com-a açıqlama verən Avro Atlantik Şuranın sədri Sülhəddin Əkbər, ilk növbədə Azərbaycan tərəfinin danışıqlar prosesinə yanaşma konsepsiyasının dəyişməsinin zəruri olduğunu bildirdi.” Azərbaycanın yanaşması bundan ibarətdir ki, ATƏT-in Minsk qrupu tərəfindən irəli sürülən mərhələli həll planını qəbul edilsin. Ermənistan tərəfi isə buna uyğun olaraq çalışır ki, ətraf rayonların tərk edilməsi müqabilində Dağlıq Qarabağın statusu indidən bəlli olsun. Bu statusu isə Dağlıq Qarabağda kompakt şəkildə yaşayan ermənilərin səs verməsi ilə həll etmək istəyir.”
Bu cür konseptual yanaşmanın yanlış olduğunu qeyd edən Sülhəddin bəy, “bu, Azərbaycanın milli maraqlarına cavab vermir”, - deyə bildirdi. “Eyni zamanda beynəlxalq hüquq normalarına, BMT Assembleyasının Qarabağla bağlı qəbul etdiyi qətnaməyə və eyni halda Minsk qrupu yaradılarkən təsis edilən ilkin mandatına da ziddir.”
Minsk qrupunun ilkin mandatına uyğun olaraq ilk növbədə Dağlıq Qarabağdan işğalçı qoşunların çıxarılmasının əsas götürüldüyün qeyd edən Sülhəddin Əkbər, torpaqlarımızın işğaldan azad edilmədən Dağlıq Qarabağın statusunun müəyyən edilməsinin yol verilməz olduğunu bildirdi. “Hesab edirəm ki, Azərbaycan bu istiqamətdə olan konsepsiyasına dəyişməlidir. Avro Atlantik Şura olaraqda belə bir təkliflə çıxış etmişik. Əgər Dağlıq Qarabağın ətraf rayonları işğaldan azad olunarsa, sonrakı ikinci mərhələdə işğal edilmiş torpaqlarımızdan Ermənistan Respublikasının işğalçı qoşunları çıxardılmalıdır. Bu proseslərdən sonra Azərbaycan Dağlıq Qarabağda yaşayan öz vətəndaşları ilə danışıqlara başlaya bilər. Yalnız o zaman hansısa siyasi kompromislərdən və razılaşmalardan söhbət gedə bilər.”
Dizayn :Networkbil.net . 2009 FAKTXƏBƏR . Dərc olunan materilların mətninə görə, redaksiya heç bir məsuliyyət daşımır. Saytdakı materiallardan istifadə edərkən istinad zəruridir.
