5 saylı cəzaçəkmə müəssisəsində saxlanılan AXCP Ali Məclisinin üzvü Elnur İsrəfilov prezident İlham Əliyevə iki müraciət ünvanlayıb. Onun müraciətləri eksklüziv olaraq “Qafqazinfo” portalına daxil olub.

Müxalifətçi fəal birinci müraciətində 2 aprel mitinqində iştirakına görə səmimi peşmançılıq keçirdiyini bildirərək öz silahdaşlarını və cəbhəçi dayısını ittiham edib, dövlət başçısından tez bir zamanda əfv olunmasını xahiş edib. İkinci müraciətində isə o, prezidentin sədri olduğu YAP-ın sıralarına keçməkdə yardımçı olmağı xahiş edib.
1983-cü ildə Yevlax rayonunda anadan olmuş E.İsrəfilov prezident Əliyevə ilk müraciətində bildirir ki, o, Səbayel Rayon Məhkəməsinin 25 avqust, 2011-ci il tarixli hökmü ilə CM-in 186. 1, 233, 663-cü maddələri ilə təqsirli bilinərək 2 il 6 ay müddətində azadlıqdan məhrum olunub. Məhkum ötən il aprelin 1-də AXCP üzvü və partiya sədri Əli Kərimlinin müşaviri olan dayısı Məmməd İbrahimli Əziz oğlunun ona zəng edərək Bakıya çağırdığını, həmin gün axşam Yevlaxdan paytaxta yola düşdüyünü bildirir: “2 apreldə səhər tezdən mən dayımgildə oldum. O, həmin gün saat 13:30 radələrində məni və oğlu Toğrulu “Torqovı”ya gəlməyə və birlikdə şəhəri gəzməyə dəvət etdi. Yalnız ora gələndə bildim ki, camaat mitinq keçirmək üçün toplaşıb. Hökumət əleyhinə şüarlar səsləndirirdilər”.
E.İsrəfilov müraciətində yazır ki, bilik səviyyəsi, təhsili aşağı səviyyədə olduğu üçün etdiyi hərəkətlərin düzgün olmadığını qiymətləndirə bilməyib, bir qrup insanın təsiri altına düşərək onların etdiyi hərəkətləri təkrarlayıb: “Qanunsuz hərəkətlərə yol verdiyimi başa düşmürdüm. Sonradan bildim ki, bu, icazəsiz təşkil edilib. Buna görə polis tərəfindən saxlanılaraq Səbayel Rayon Polis Şöbəsinə gətirildim”.
Artıq 10 aydır cəza çəkdiyini, əməlinin xarakterini başa düşdüyünü və peşmanlıq çəkdiyini yazan məhkum bildirir ki, bu işə dayısı M.İbrahimli tərəfindən cəlb olunub. Özünü bir vicdan məhbusu kimi yox, cinayət xarakterli tədbirin iştirakçısı kimi qələmə verən E.İsrəfilov daha sonra yazır: “Mən heç bir partiyanın üzvü olmamışam, lakin sonradan mənə məlum oldu ki, məni AXCP-yə üzv seçiblər”.
E.İsrəfilov müraciətində daha sonra yazıb: “Cəza çəkdiyim müddətdə səhhətim və ailə vəziyyətim pisləşib. Mən bir gözdən III qrup əliləm. Qardaşımla birlikdə cəza çəkirəm. Özüm ailəliyəm, iki uşağım var. Ailə vəziyyətim pisdir. Qardaşımın da iki uşağı var. Ailəmiz maddi cəhətdən əziyyət çəkir”.
Vicdan məhbusu, prezidentdən xahiş edib ki, yuxarıda qeyd olunanları nəzərə alaraq, konstitusiyanın verdiyi müstəsna hüququndan istifadə edərək onu əfv etsin.
E.İsrəfilov İ.Əliyevə ikinci müraciətində isə yazıb ki, o, hakim Yeni Azərbaycan Partiyasına üzv olmaq istəyir. Buna görə də prezidentdən YAP-a üzv olmaqda ona kömək göstərməyi xahiş edib.
E. İsrəfilovun dayısı Məmməd İbrahimli isə qəzetimizə açıqlamasında deyib ki, bacısı oğlunun əfv ərizəsi yazmasına inanmır: “Yanvarın sonunda “zon”da Elnurla görüşəndə mənə dedi ki, bir hüquq müdafiəçisi və saxlandığı həbsxananın rəisi ona əfv ərizəsi yazmağı təklif edib. Amma mənə əfv ərizəsi yazmamaqda israrlı olduğunu bildirdi”.
M.İbrahimli bildirdi ki, sabah (bu gün-L.İ) 5 saylı cəzaçəkmə müəssisəsinə gedib E.İsrəfilovla görüşəndən sonra mətbuata tam açıqlama verəcək: “Nə baş verdiyindən məlumatım yoxdur. Elnurun oğurluğa görə həbs olunan Anar adında qardaşı da var. Eyni cəzaçəkmə müəssisəsindədirlər. Ola bilsin ki, ərizəni o yazıb, amma Elnurun adına çıxıblar. Hər şey sabah dəqiqləşəcək”.
AXCP sədrinin müşaviri Gözəl Bayramlı isə bildirdi ki, məsələni dəqiq aydınlaşdırmadan şərh verməyi düzgün saymır: “AXCP sıralarından olan siyasi  məhbuslar sona qədər mövqelərini müdafiə ediblər. Bizim təcrübəmizdə siyasi məhbuslardan kimsə hakimiyyətə təslim olmayıb. Elnur AXCP-yə  2 aprel mitinqindən bir neçə ay sonra üzv yazılıb. Onun belə bir addım atdığına inana bilmirəm”.
G.Bayramlı beynəlxalq birliyin vicdan məhbuslarının azadlığa buraxılması ilə bağlı tələblərinin artdığı bir zamanda E.İsrəfilovun əfv ərizəsinin ortaya çıxmasını təsadüfi də saymır: “Bizim cəbhəçilərə, vicdan məhbuslarının hamısına İlham Əliyevin adına əfv ərizəsi yazmaq təklif olunub. Onlar bundan imtina ediblər. Azərbaycan hakimiyyəti çox zəif bir adamın üzərində işləməyə əl qoyub. Azərbaycan hakimiyyəti Elnur İsrəfilovun qayğısına qalsaydı onun əlillik kartı borclu olduğu adamda olmazdı. Elnurun ailəsinin maddi durumu çox pisdir. Çox güman ki,  hakimiyyət də bundan istifadə edib. Elnurun siyasi proseslərdə bişməməsi, bitərəf təbəqədən gəlməsi, uşaqları xəstə olduğundan onun üzərində işləmək addımı atıblar. Burada AXCP heç nə itirmir. Hakimiyyət günahsız insanları buraxmaq əvəzinə, bu yola əl atır. Bu, Azərbaycan hakimiyyətinin zəif və rəzil gündə olduğunun göstəricisidir. Hesab edirəm ki, Elnur ərizə yazsa da, bunu öz iradəsi çərçivəsində etməyib”. \Yeni Müsavat