XİN-nin mətbuat xidmətindən FaktXeber.com-a verilən məlumata görə, nazir Elmar Məmmədyarovdan öncə çıxış edən Meksikanın xarici işlər naziri Azərbaycanın və digər qonaq qismində iştirak edən ölkələrin bu toplantıda iştirakının bu ölkələrin təmsil etdiyi regionların əhəmiyyətindən və beynəlxalq aləmdəki rollarından irəli gəldiyini bildirib.

Cənubi Afrika Respublikasının xarici işlər naziri Azərbaycanı nümunə gətirərək, inkişaf etmiş ölkələri Afrikanın yoxsul ölkələrinə yardım etməyə səsləyib.

Nazir Elmar Məmmədyarov çıxışında davamlı inkişaf və yoxsulluğun aradan qaldırılması məsələlərinə toxunaraq, Azərbaycanın 20 illik müstəqillik dönəmində bu sahədə müsbət nəticələr əldə olunduğunu vurğulayıb. Azərbaycan torpaqlarının əhəmiyyətli bir hissəsinin hələ də işğal altında olduğunu bildirən E.Məmmədyarov, Azərbaycanın davamlı şəkildə müstəqilliyinin və suverenliyinin möhkəmləndirilməsi üzərində çalışdığını bildirib. O, Azərbaycanda təhsil sahəsinə böyük investisiyalar yatırıldığını deyərək, bununla da gələcək nəsillərin güclü iqtisadiyyata və sosial siyasətə malik olan qüdrətli dövlət qurmalarının mümkün olacağını söyləyib, İnformasiya və Kommunikasiya Texnologiyaları sahəsinin də ölkəmizdə əsas inkişaf edən istiqamət olduğunu bildirib.

Gender bərabərliyi məsələsinə toxunan Azərbaycanın XİN rəhbəri cəmiyyətdə qadının mühüm rolundan danışıb və xüsusən də inkişaf etməkdə olan ölkələrdə bu məsələlərə diqqət yetirilməsinin vacibliyini vurğulayıb.

Təhlükəsizlik məsələlərinə toxunan E.Məmmədyarov, bu sahədə qəbul edilən qərarların tətbiq edilmə mexanizminin də olmasının vacibliyini diqqətə çatdırıb, BMT TŞ-nın Ermənistan – Azərbaycan Dağlıq Qarabağ münaqişəsi ilə bağlı 4 qətnamə qəbul etməsinə baxmayaraq, bu qətnamələrin tətbiq mexanizminin olmaması kimi xoşağəlməz təcrübəsinin olduğunu xatırladıb. Nazir BMT TŞ-nın öz qərarlarına hörmətlə yanaşmasının vacib olduğunu qeyd edərək, qərarların tətbiq mexanizminin də yaradılmasının mühümlüyünü deyib. O, BMT-nin universal bir təşkilat kimi əhəmiyyətinin azaldılmasında maraqlı olmadığımızı söyləyərək, BMT-nin qəbul edilmiş qərarlarının icrasının təmin olunması üçün daha təsirli səlahiyyətlərə malik olmasının vacibliyini bildirib, bunun qlobal və regional təhlükəsizliyin təminatı üçün əsas şərtlərdən biri olduğunu bildirib.

E.Məmmədyarov G-20 ölkələrinin xarici işlər nazirlərinin qeyri-rəsmi görüşü çərçivəsində ABŞ-ın dövlət katibi, Kolumbiya, Birləşmiş Ərəb Əmirlikləri, Avstraliya, Meksika, Türkiyə, Benin, Çili, Cənubi Afrika Respublikasının xarici işlər nazirləri və Afrika İttifaqının nümayəndə heyətinin rəhbəri ilə görüşlər keçirib.

Emin Nəsirli