DEVAMM dindarlara qarşı başlanan yeni təqiblərlə bağlı bəyanat qəbul etmişdir. Mərkəzin sədri Hacı İlqar İbrahimoğlunun yaydığı bəyanatda bildirilir: "Son günlər Azərbaycanda dindarlara qarşı yeni təqib dalğası başlanılıb. Ən üzücü odur ki, təqiblər eyni zamanda öklənin müxtəlif regionlarında yer alıb. Bunlar səbəbsiz, əsassız, qeyri-hüquqi yanaşmalarla aparıldığından, repressiya səciyyəsi daşıyırlar. Hansı normal təfəkkürlü insan qəbul edər ki, eyni zamanda ölkənin müxtəlif yerlərində yaşayan dinc, sakit insanlar, o cümlədən alimlər və ictimai fəallar eyni zamanda, eyni gündə narkotikdən istifadə etməyə, silah gəzdirməyə, xuliqanlıq etməyə başladılar, özü də kütləvi surətdə? Ən qərəzli insan belə təsdiqləyər ki, baş verənlər məqsdəyönlü təqiblərin təzahürüdür. Təbii ki, bunlar - insan haqlarının, qanunçuluğun kobud surətdə pozulması olmaqla bərabər, son dərəcə gərgin ictimai ab-havaya rəvac verən, cəmiyyəti parçalayan amil rolunu oynayır.
Qeyd etməyi zəruri bilirik ki, DEVAMM olaraq baş verənləri neçə müddətdən bəri gedən təqib kampaniyasının yeni dalğası kimi qiymətləndiririk. Çox təəssüf ki, artıq səngiməkdə olan köhnə dalğa, dərhal yenisi ilə əvəz edildi. Normallaşma işartıları verən vəziyyət, dərhal kəskin surətdə gərginləşdirildi.
Əlamətdardır ki, hər dəfə bu dalğalar Azərbaycanla İranın arasında münasibətlərin soyuması fonunda baş verir. Bu, onu deməyə əsas verir ki, ölkəmizin məmurları İranın müəyyən dairələrinın fəaliyyətindən narazılığı nədənsə Azərbaycan dindarlarının həbsi və təqibi ilə büruzə verirlər. DEVAMM olaraq bu vəziyyətin absurdluğuna diqqət çəkir və ölkə inanclılarına qarşı belə yad, marginallaşdırıcı münasibətin qeyri-konstruktiv, dövlətçilik yanaşmasına zidd olduğunu vurğulayırıq.
DEVAMM olaraq dindarlara qarşı yeni təqib dalğasından böyük narahatlığımızı bildirir və repressiyaların dərhal dayandırılmasına, həbs olunanların təcili azad edilməsinə çağırırıq. Bir daha xatırlatmağı lazım bilirik ki, ölkənin həqiqi sabitliyi və inkişafının yolu - yalnız və yalnız insan haqlarının və qanunçuluğun təminindən keçir. İnsanları etmədikləri əməllərə görə həbs etmək - hüquqi nihilizmə və digər ictimai fəsadlara birbaşa yol açan vəziyyəti generasiya edir. Biz bir daha vəziyyəti kökündən dəyişdirməyə, ölkə dindarlarına qarşı formalaşmaqda olan yad yanaşmaları tərk etməyə çağırırıq".

"Milli-Mənəvi Dəyərlər" İctimai Birliyi də ölkədə son günlər baş verən kütləvi həbsələrlə bağlı bəyanat yayıb.
Bəyanatda deyilir: “Azərbaycan Respublikasında son günlərdə dindarlara qarşı kütləvi həbslər aparılmaqdadır. Ötən illər ərzində müxtəlif təzyiqlər edilsə də, son bir neçə gündür həyata keçirilən repressiyanın miqyası, misli görünməmiş tərzdə geniş olmuşdur. Beləki, bir həftə  ərzində ölkəboyu aparılan həbslərdə dindarlar əsassız olaraq həbs edilmişdir. Eyni zamanda ölkənin bir neçə regionunda aparılan belə ədalətsiz həbslər Azərbaycan Respublikasında hüquq-mühavizə sisteminin hansı formada işlədiyini bir daha aydınlaşdırdı.
“Milli-Mənəvi Dəyərlər” İctimai Birliyi Azərbaycan dövlətinin, dövlətçiliyinin, milli-mənəvi dəyərlərin qorunmasında hər zaman fəal iştirak etmiş dini kəsim ilə dövlət rəhbərliyi arasında gərginlik meydana gətirmək cəhdlərinin, həm ümummilli maraqlara ciddi zərər vurduğunu, həm də gələcək üçün yaxşı heç bir şey vəd etmədiyini bildirir və cəmiyyətdə namuslu, əxlaqlı, dürüst, şərəfli və ləyaqətli insanlar kimi tanınmış vətən övladlarının şərlənərək gülünc, nalayiq, ikrah doğuran ittihamla həbs olunmasını kəskin şəkildə qınayır, baş verən özbaşnalığa və insan hüquqlarının kobud surətdə pozulmasına qəti etirazını bildirir, ölkənin müvafiq rəhbər strukturlarına səslənərək, bu məmur və polis özbaşnalığına, islamçılara qarşı təzyiqlərə son qoymağa çağırır."