FaktXeber.com xəbər verir ki, Sumqayıt şəhər sakini 30 yaşlı Zöhrab Quliyev şübhəli şəxs qismində saxlanılıb. Bu barədə Sumqayıt şəhər Polis İdarəsindən bildirilib. Məlumata görə, polis əməkdaşlarının həyata keçirdiyi əməliyyat tədbirləri nəticəsində şəhər sakini 30 yaşlı Zöhrab Quliyev şübhəli şəxs qismində saxlanılıb. Onun üzərindən “Naqan” tipli tapança və 7 ədəd güllə aşkar edilərək götürülüb. Z. Quliyevin yaşadığı evə baxış keçirən əməliyyatçılar qumbara və müxtəlif çaplı güllələr aşkar ediblər.

Bu barədə Birlik.az saytına şübhəli şəxs qismində saxlanılan Zöhrab Quliyevin qohumları danışdı:–“Eşitdik ki, girib evdən qumbara çıxardıblar. Məsələ bizə qaranlıq qaldığı üçün polis bölməsinə gedirik. Bu adam hələ indiyə kimi bir toyuq başı da kəsməyib”

Bundan əlavə AİP üzvü İlham Ələkbərov iki gündür Gəncədə polis şöbəsində saxlanılır. Gəncədə Azərbaycan İslam Partiyasının (AİP)üzvü İlham Ələkbərov dünən şəhərin Kəpəz RPŞ əməkdaşları tərəfindən şöbəyə aparılıb. Onun taleyi barədə heç bir məlumat yoxdur. Ailə üzvlərinə bildirilib ki, İ.Ələkbərov şöbədə saxlanılır. Lakin səbəbi bilinmir. İlham Ələkbərovun qardaşı KİV-ə deyib ki, saxlanılan şəxs polisdə döyülüb.

Bu gün isə səhər saatlarında şəhər ruhanisi Əliyev Asəf avtomobili idarə edərkən DYP tərəfindən saxlanılıb və Nizami RPŞ-ə aparılıb. Ailəsinin polisə müraciəti zamanı polis idarəsindən bildirilib ki, A.Əliyev orda saxlanılır, səbəb göstərilmir. Hacı Asəfin vəziyyəti barədə ailəsinə məlumat verilmir.

Digər tərəfdən isə bu gün Cəlilabad rayonu Göytəpə şəhər ruhanisi Əliyev İlqar Əyyub oğlu Cümə namazından sonra Cəlilabad polisi tərəfindən saxlanılaraq polis idarəsinə aparılmışdır. Hacı İlqar Əliyevin saxlanmasının səbəbi bilinmir. Cəlilabad polisi həmçinin dindar Əliyev Nadir Məmmədağa oğlunu da bu gün Cümə namazından sonra saxlayaraq polis idarəsinə aparmışdır. Onun da hansı səbəbdən saxlanması haqqında məlumat verilmir.

İslamazeri.az saytına məlumat verən binə sakinləri isə bildirib ki, Bakının Binə qəsəbəsindəki evindən aparılan ruhani Hacı İlhamdan indiyə qədər heç bir məlumat əldə etmək mümkün olmayıb.

Həbsin səbəbləri məlum deyil. Ruhaninin tanışları Xəzər Rayonu Polis idarəsinə məlumat haqqında müraciət ediblər. Lakin heç bir məlumat verilməyib.

Qeyd edək ki, MTN-nin əməkdaşları bir neçə gündür ki, Nardaranda axtarışlar aparır. Nardaran Ağsaqqallar Şurasının sədri Natiq Kərimov bildirib ki, bir həftədir davam edən əməliyyat tədbirlərində təqribən 20 nəfərə yaxın şəxs saxlanılıb. Əməliyyatlar əsasən gecə saatlarında keçirilib. Saxlanılanlardan bir neçə nəfər dindirmələrdən sonra buraxılıb. Onlardan evlərində silah olub-olmaması soruşulub. Hələlik bu işin əsl səbəbi bəlli deyil. Həbs edilənlərin demək olar ki, hamısı gənclərdir və onlar vəkillə təmin edilməyiblər.

Nicat Xaliqoğlu