Kitabi Dədə Qorqud dastanına görə qədim Oğuz elində buğa yıxmayan igidə ad verməzdilər. Ad qazanmaq istəyən igid mütləq buğa ilə əlbəyaxa olmalı idi. Müasir dövrümüzdə isə bu cür yarışlar yalnız İspaniyada keçirilir. Öküz üzərində öz məharətini nümayiş etdirmək istəyən matadorlar yüz milərlə insanı arenaya toplayaraq şouya başlıyırlar. Bakıda da bu gün əsl şou idi. Amma bu dəfə şounu metronun Nizami stansiyasının yaxınlığında öküz təkbaşına göstərirdi. Yəni, matadorsuz.

ANS-nin məlumatına görə, səhər tezdən paytaxt sakinləri şəhərin düz mərkəzində qeyri-adi mənzərənin şahidi olublar. Yolunu azmış bir öküz heç kəsə məhəl qoymadan küçələrdə o tərəf- bu tərəfə qaçırdı.

Heç kim bu öküzün kimdən və nəyə görə qaçdığını bilmirdi. Sadəcə hamı bu qeyri-adi mənzərəni təəcüblə seyr edirdi. Boynundakı zəncirdən bəlli olurdu ki, bu şəhərə kəsilmək üçün gətirilən heyvanlardan biridir və çox güman ki, ya maşından düşürülərkən, ya da kəsilərkən qəssabın əlindən qaçıb. Hər nə isə öküz düz şəhərin mərkəzində, lap Xarici İşlər Nazirliyinin bir addımlığında var-gəl edirdi. Öküzü ilk görənlərdən biri- paytaxt sakini Əhməd Əhmədov deyir ki, heyvana səhər saat 9:30-da yarısında beşmərtəbənin ətrafında rast gəlib. Bir neçə dəfə "Beşmərtəbə"dən Xarici İşlər Nazirliyinin qarşısına qədər dövrə vuran öküz elə hey qaçırdı. Öküz yolunu yenə XİN-in qarşısından salmışdı. Amma nə qədər dövrə vururdusa, yenə hərlənib-firlanib bura gəlirdi.

Öküz qarşısına çıxan hər kəsi tapdalamaq iqtidarında olduğundan onu kimsə saxlaya bilmirdi. Heyvan o qədər hürkmüşdü ki, hətta bir mağazanın pəncərəsini də sındırdı. Sonra yenə götürüldü. Öküzün budəfəki ünvanı Əlibəy Hüseynzadə və Əhmədbəy Zivərbəyov küçələri olub.

Öküzün zərərsizləşdirilməsinə polislər də cəlb olunub. Bəlkə hansısa cinayətkarı tutmaq onlar üçün bu öküzü tutmaqdan daha asan olardı.

Qaçmaqdan yorulan öküz bir müddət Azərbaycan Dövlət Milli Dram Teatrının qarşısındakı parkda dayanıb. Öküzün tutulmasına ətrafdakı insanlar öz istəkləri ilə cəlb olunmuşdu. Kəndir, filan da tapmışdılar, sadəcə özlərində güc və iradə tapmadıqlarından öküzə yaxınlaşmaq mümkün olmurdu.

Bu dəfə də tələdən qaçan öküzün dərdinə dərman aptek olur. Aptekdə isə bu arzuolunmaz qonağı heç kim gözləmirdi. Optik əşyaların satıldığı hissədə öküz bir anlıq sakitləşdi. Mat-məətəl eynəklərə baxdı. Onu tutmaq istədiklərini hiss edincə yenə iynəsi tutdu...

Aptekə vurduğu maddi ziyana görə orada işləyənləri qorxudan bu öküzü hələ çox xatırlayacaqlar. Aptek sahibi Afiq Qafarov bidlirib ki, öküz 12 minlik gözyoxlayan aparatı sındırıb. Daha sonra 700 manat dəyərində olan başqa bir cihazı sındırıb. Orada olan optik cihazlara ziyan dəyib.

Qaçmaqdan ləhləyən öküz yenə dincəlmək üçün Azərbaycan Dövlət Milli Dram Teatrının qarşısındakı parka gəlib. Onu tutmaq istəyənlərin tələsi bu dəfə də alınmayıb. Qısası öküz qaçıb, hamı da onun dalınca qaçıb. Operator Rizvan İsmayılov da öküzün ardınca o qədər qaçıb ki, bəlkə bu yaşına qədər heç bir qızın ardınca bu qədər qaçmamışdı. Fərasətli öküzün isə bu dəfə istiqaməti Mərkəzi Univermaq olub. Deyəsən, İspaniyadan matodor gətirmək lazım gələcəkdi...

Qeyd edək ki, öküz artıq tutulub.

Nərgiz Kazımlı