Azərbaycan prezidenti İlham Əliyev NATO-nun baş katibi Anders Rasmussenlə görüşərkən bildirib ki, Azərbaycanın ərazi bütövlüyü bərpa edilməsi üçün yaxşı hüquqi əsas var. Prezident qeyd edib ki, Birləşmiş Millətlər Təşkilatının Təhlükəsizlik Şurası erməni qoşunlarının Azərbaycanın işğal olunmuş ərazilərindən qeyd-şərtsiz və dərhal çıxarılmasını tələb edən dörd qətnamə qəbul edib. Biz gözləyirik ki, erməni tərəfi bu bağlı qətnamələrinə əməl edəcək. Ölkə başçısını gözləyirik deməsinə əsas götürərək, Azərbaycan tərəfi torpaqlarının azad edilməsi üçün nə vaxta qədər gözləməlidir? Mövzu ilə bağlı FaktXeber.com-a açıqlama verən politoloq Zərdüşt Əlizadənin maraqlı fikirlər səsləndirdi. 

BMT-nin Təhlükəsizlik Şurasının Qətnamələrinin, xüsusilə Qarabağla bağlı verdiyi qətnaməsinin çox yayğın olduğunu qeyd edən politoloq, “bu da bilərəkdən edilib. Ona görə ki, münaqişəni törədən və onu qızışdıran Rusiya, ABŞ və Fransa, BMT təhlükəsizlik Şurasının veto hüquqlu üzvləridir”, - deyə bildirdi: “Məhz bu səbəbdən də həmin qətnamələrdə Ermənistan Respublikasının adı çəkilmir. Hansısa mücərrəd erməni qüvvələri adı çəkilir ki, həmin erməni qüvvələrinin beynəlxalq hüquqa görə heç bir məsuliyyəti yoxdur. Söhbət hansı erməni qüvvələrindən gedir? Cavabı isə naməlumdur. Çünki BMT dövlətlərin üzv olduğu təşkilatdır. Qətnamədə adı çəkilən erməni qüvvələrinin orada üzvlüyü yoxdur.”

Zərdüşt bəy sonra qeyd etdi ki, BMT-nin qətnaməsində Ermənistan Respublikası adı çəkilsəydi, onda hazırkı Ermənistan hakimiyyəti məsuliyyət daşıyardı: “Amma ABŞ və Fransa istəmirlər ki, bu təcavüzə görə Ermənistan respublikası məsuliyyət daşısın. Bəli 20 ildir ki, Azərbaycan tərəfi deyir ki, bu qətnamələr bizim xeyrimizədir. Məsələyə hüquqi baxımdan yanaşdıqda, belə bir nəticə əldə edilir ki, Ermənistan  Respublikası BMT tərəfindən təcavüzkar dövlət kimi tanınmayıb.”

Erməni təcavüzkarlığının bir neçə dövlət və ayrı təşkilatlar tərəfindən tanındığını qeyd edən Zərdüşt bəy, lakin beynəlxalq miqyasda isə Ermənistanın birmənalı olaraq təcavüzkar dövlət kimi qəbul edilməyini bildirdi: “Azərbaycan prezident Ermənistan tərəfi qətnamələrdə göstərilən öhdəliklərə əməl etməlidir deməsində məqsəd ictimai rəyi aldatmaqdır. Çünki ictimai rəyə belə bir fikir təlqin ediblər ki, o qətnamələr Azərbaycan diplomatiyasının möhtəşəm qələbəsidir. Amma o qələbə deyil. Sadəcə olaraq Azərbaycanı başdan eləmək üçün atılan addımdır. Məsələn, biri Mənzil Kommunal İstismar İdarəsinə məktub yazır ki, bizim borumuz partlayıb gəlin təmir edin. Onlar isə məktubun cavabında yazırlar ki, havalar bu il şaxtalı keçdiyinə görə, borular partlayıb. Biz tələb edirik, onlar isə başdan edirlər.“

Xəyal Şükür