FaktXeber.com xəbər verir ki, Qarabağ Blokunun sonuncu toplantısında dünyada və ölkədə baş verən ictimai-siyasi hadisələr sırasında ötən həftə ATƏT-in fəaliyyətdə olan sədri İrlandiyanın xarici işlər naziri İmon Gilmorun BMT-nin Təhlükəsizlik Şurasında çıxışı zamanı ATƏT ərazisində olan münaqişələrin, o cümlədən Dağlıq Qarabağ probleminin uzunmüddətli həllində İrlandiya modelinin tətbiq edilməsi təşəbbüsü də müzakirə olunub. Müzakirələrdə qeyd edilib ki, Şimali İrlandiya İrlandiya dövlətinin ərazisidir, İngiltərə isə özünün suverenliyini o ərazidə saxlayır və həmin ərazinin İrlandiyaya birləşməsinin əleyhinə çıxır. Bu konteksdən Qarabağ probleminə yanaşsaq onda belə çıxır ki, Qarabağ Ermənistan ərazisidir amma Azərbaycan onu nəzarəti altında saxlayır. Bu baxımdan ATƏT sədrinin bu təşəbbüsü qətiyyətlə pislənilib və onun bu mövqeyi Dağlıq Qarabağ problemini yaxından bilməməsi ilə əlaqələndirilib. Eyni zamanda bir daha qeyd edilib ki, Dağlıq Qarabağ Ermənistan tərəfindən işğal olunduğundan beynəlxalq hüquq normalarına görə işğal olunmuş ərazilər Azərbaycana qaytarılmalı və işğalçı tərəf olan Ermənistanın isə işğalın nəticələrindən bəhrələnməsinə yol verilməməlidir.

Nicat Xaliqoğlu