İqbal Ağazadə: “Qarabağla bağlı bir şey demək mümkündür ki, mövcud hakimiyyət bu münaqişənin həll olunmasında acizdir”
Nurəddin Məmmədli: “Xalq bu hakimiyyətdən o qədər bezib ki, ermənilərlə vuruşmaq istəyi də aradan gedib”

Azərbaycan hakimiyyətinin Qarabağ münaqişəsi ilə bağlı apardığı danışıqlar və irəli sürdüyü siyasət ölkənin aparıcı müxalifət partiyaları tərəfindən daima kəskin tənqid olunur. Bəs müxalif partiyalar hakimiyyətdə olarsa, Qarabağ münaqişəsi ilə bağlı danışıqlarda irəliləyiş əldə etmək üçün hansı işlər görərdilər və ya hakimiyyətdə olduqları müddətdə münaqişə ilə bağlı danışıqlar mövcud vəziyyətdə gəlib çıxsaydı, müharibə variantını seçərdilərmi?
Mövzu ilə bağlı FaktXeber.com-a açıqlama verən Ümid Partiyasının sədri İqbal Ağazadə və AXCP-nin sədr müavini Nurəddin Məmmədli maraqlı fikirlər səsləndirdi.

Bununla bağlı hazırda nə isə deməyin çox çətin olduğunu qeyd edən İqbal bəy, hazırda Qarabağla bağlı danışıqlarının hansı istiqamətdə aparıldığı haqqında məlumatların gizlədildiyini bildirdi: “Əvvəlcə münaqişə ilə bağlı situasiyanı bilmək lazımdır. Situasiyanı bildikdən sonra artıq başqa addımların atılması və danışıqların fərqli müstəvidə getməsi üçün irəli getmək mümkündür. Bu gün təkliflər və variantlar haqqında heç nə bilmədən, nə isə demək çətindir. Münaqişə ilə bağlı aparılan danışıqlar konkret olaraq cəmiyyətdən gizlədilir. Lakin Qarabağla bağlı bir şey demək mümkündür ki, mövcud hakimiyyət bu münaqişənin həll olunmasında acizdir.

Sonda müharibənin problemin həlli yolu olmadığını qeyd edən İqbal bəy, “danışıqlar vasitəsilə problemin həlli tamamilə mümkündür, sadəcə olaraq buna fərqli rakursdan yanaşmaq lazımdır”, - deyə bildirdi.

AXCP-nin sədr müavini Nürəddin Məmmədli isə torpaqların qaytarılmasının yeganə yolunun mövcud hakimiyyətinin sona çatması ilə mümkün olduğunu bildirdi: “Nə qədər ki, bu hakimiyyət var, Qarabağ münaqişəsi həll olunmayacaq. Qarabağ münaqişəsinin həll olunmasını nə Azərbaycan, nə də ki Ermənistan hakimiyyəti istəyir. Çünki bunlar Qarabağ dalğası ilə hakimiyyətə gələrək bu faktordan özlərinin hakimiyyətdə qalması üçün istifadə edirlər.”

Qarabağ münaqişəsinin həlli üçün ilk növbədə ölkədə iqtisadiyyatının gücləndirilməsinin lazım olduğunu qeyd edən Nürəddin bəy, “iqtisadiyyatın inkişaf etdiyi halda xalq ilə hakimiyyət arasında hər hansı bir normal münasibətlər olsa və eyni halda hakimiyyət xalqı sevərək onun iradəsinə uyğun siyasət yürütsə, Qarabağ münaqişəsinin həllinə nail olmaq mümkündür”, - deyə bildirdi.

“Hazırda ölkədə vətənpərvərlik hissi itirilib. Artıq xalqı döyüşə məcbur etmək belə çətindir. Çünki xalq bu hakimiyyətdən o qədər bezib ki, onun ermənilərlə vuruşmaq istəyi də aradan gedib. Eyni halda, hakimiyyət korrupsionerləşəndə, beynəlxalq aləmdə onun nüfuzu olmur.
AXCP-nin Qarabağ münaqişəsi ilə bağlı çox ciddi konseptual proqramları mövcuddur. Biz proqramları hakimiyyətə təqdim etməyimizə baxmayaraq, bu günə qədər nəzərə almayıblar. Qarabağı azad etmək istəyən hakimiyyət sonda güclü ordu yaratmalıdır. Bir sözlə hakimiyyət xalq və ordunun formal birliyinə sahib olmalıdır. Erməni bunu hiss eləsə beynəlxalq müzakirələrdə geri çəkilməyə məcbur olacaq.“

Sonda “hakimiyyətdə olacağınız təqdirdə münaqişə ilə bağlı danışıqların bu vəziyyətə çatarsa, müharibə variantını seçərdinizmi”, - sualına da aydınlıq gətirən Nurəddin Məmmədli belə söylədi: “Əvvəla müharibə variantı indiki halda o qədər də məqbul hesab olunmur. Digər tərəfdən, müharibə variantına ehtiyac da yoxdur. Əgər daxili problemlər öz həllini tapsa, Qarabağ münaqişəsi də həll olunacaq. Bizim ritorikamızda müharibə anlayışı yoxdur. Amma bütün variantlar tükəndiyi və alternativ həll yolunun qalmadığı halda, Azərbaycan xalqının tam haqqıdır ki, işğal olunmuş torpaqlarını müharibə yolu ilə geri qaytarsın.”

Xəyal Şükür