FaktXeber.com xəbər verir ki, Milli Məclisin bu gün keçirilən iclasının cari məsələlərin müzakirəsi zamanı deputatlar Azərbaycanda keçiriləcək “Eurovosion” yarışması haqda danışıblar.

Deputat Zahid Oruc deyib ki, Müsavat Partiyasının başqanı İsa Qəmbər “Avroviziya” yarışması ilə bağlı müraciət edib: “Bu rəzil bir müraciətdir. Bu məntiqlə özlərini kimlərlə eyniləşdirilər? Vaxtilə Azərbaycan bolşevikləri də Qırmızı ordunu belə gözləyirdilər. Mənim üşün ən pis düşünən müxalifətçi ən yaxşı düşünən ermənidən üstündür. Amma bunlar “Eurovosion” qələbəsini belə hakimiyyətin əleyhinə çevirmək istəyirlər. Qələbədən belə özləri üçün ayrıca səhnə yaratmağa çalışırlar. 1500 jurnalisti öz tribunasına çevirmək istəyirlər. İsa Qəmbər deyir ki, bütün iştirakçılar tribunadan siyasi məhbuslara azadlıq tələb edin”.

Böyük Quruluş Partiyasının sədri, deputat Fazil Mustafa bildirib ki, həmkarının dedikləri ilə qismən razıdır: “Amma görünür, biz bəzi məsələlərdə ermənilərdən nəyisə öyrənməliyik. Çünki ermənilər daxillərində olan hansısa problemdən onlara qarşı istifadə edilirsə, bunu dərhal həll edirlər, beynəlxalq təzyiqin qarşısını alırlar. Novruz bayramına, “Eurovosion”a qədər siyasi motivlərlə tutulan şəxsləri azadlığa buraxmaq lazımdır”.

Deputat Azay Quliyev deyib ki, hamı bir həqiqəti bilir və qəbul edir ki, bu müsabiqə heç bir halda siyasi aksiya deyil, mədəni hadisədir. Bu məsələdə bəzi qüvvələr Azərbaycanın uğuruna kölgə salmaq, bunu Azərbaycanın əleyhinə çevirmək istəyir. Bunun üçün hətta şəbəkə fəaliyyət göstərir. Hətta parad keçiirmək istəyənlər var idi, Milli Məclisə hörmət olaraq o paradın adını çəkmək istəmirəm. Bundan başqa, Azərbaycan “Eurovision”da qələbə qazanandan sonra Leyla Yunusun başçılığı ilə bir şəbəkə yaradılıb. Bunlar sadə məsələlər deyil. Çünki onlar qrup halında fəliyyət göstərirlər və onların təxribat törədəcəyi istisna deyil. Ona görə də ictimaiyyət ayıq-sayıq olmalıdır və mövqeyini açıq şəkildə deməkdən çəkinməməmlidir.

O vurğulayıb: ”Eurovision”la bağlı xaricdə gedən yazılara baxın. Həmin yazılar “”Eurovision”dan başlayıb əmlak hüquqlarının pozulması haqqında fikirlərdə qurtarır. Yazılar nəyə xidmət edir? Bu yarışmaya kölgə salmaq istəyənlər heç nəyə nail ola bilməyəcəklər”.

Qeyd edək ki, “Facebook” şəbəkəsində dostlarına müraciət edən Müsavat başqanı İsa Qəmbər bildirib: “16 nəfər dostumuz və silahdaşımız 1 ilə yaxındır ki, vicdan məhbusu olaraq zindandadır. Bu ilin may ayında Bakıda “Avroviziya” musiqi müsabiqəsi keçiriləcək. Biz artıq Müsavat Partiyasının və İctimai Palatanın adından bəyan etmişik ki, əgər yaxın həftələrdə bütün vicdan məhbusları azad edilməyəcəksə, bu müsabiqəni çoxsaylı vicdan məhbusları və siyasi məhbuslar olan bir ölkədə təşkil etmək niyyətində olan Əliyev rejimi müsabiqə ərəfəsində və zamanında ən müxtəlif sürprizlərlə qarşı-qarşıya qalacaq. Salamnews