Avropa Komissiyası Azərbaycanla Avropa arasında viza rejiminin sadələşdirilməsi ilə bağlı sənəd layihəsini hökümətə təqdim edib. Xatırladaq ki, Avropa Birliyi Nazirlər Şurası bir müddət əvvəl Avropa Komissiyasına Azərbaycan və Ermənistanla viza rejiminin sadələşdirilməsi və readmissiya haqqında danışıqlara başlaması üçün mandat vermişdi.

AB-nin “Şərqi Tərəfdaşlığı” proqramına iqtisadi inteqrasiya komissiyasının həmsədri Vüqar Bayramov FaktXeber.com-a açıqlamasında bildirib ki, mart ayının 1 və 2-də Bakıda  Avropa Birliyi ilə Azərbaycan rəsmiləri arasında viza sadələşdirilməsinə dair  görüş keçiriləcək: “Həmin görüşdə Azərbaycan vətəndaşlarının Avropaya daha sadələşdirilmiş viza ilə getmələri məsələsi müzakirə ediləcək. Avropa Birliyinin təqdim etdiyi sənəd layihəsinə Azərbaycanla Avropa Birliyi arasında viza prosedurunun sadələşdirilməsi,rüsümların 60 avrodan 30 avroya qədər endirilməsi,  daha uzunmüddətli vizaların verilməsi, tələb olunan sənədlərin sayının azaldılması kimi islahatlar daxildir. Görüşdə həmçinin  tələbələr, idmançılar, jurnalistlər, iş adamları üçün sadələşdirilmiş vizanın verilməsi, sadələşdirilmiş yollarla şengen vizalarının alınması məsələləri gündəmə gətiriləcək. Qeyd edim ki, tələbələr, idmançılar, jurnalistlər, iş adamları üçün sadələşdirilmiş vizanın verilməsi dedikdə banklar tərəfindən depozit məbləğlərinin  tələb edilməsinin ləğvi nəzərdə tutulur”.

Məlum olur ki, görüşdə xidməti və  diplomatik pasporta malik Azərbaycan vətəndaşlarının viza almadan Avropanın əksər ölkələrinə getmələri də əksini tapacaq: “Rəsmi danışıqların Bakıdakı görüşdən sonar Brüseldə davam edəcəyi gözlənilir. 2012-ci ildə viza rejiminin sadələşdirilməsi haqqında anlaşmanın imzalanması realdır. Bu ildən  Avropa Birliyi Azərbaycan vətəndaşları üçün sadələşdirilmiş viza rejimi tətbiq edəcək”. Bununla belə iqtisaçı indiki mərhələdə AB ilə Azərbaycan arasındsa viza rejiminin tamamilə aradan qaldırılmasının nəzərdə tutulmadığını diqqətə çatdırır. Lakin viza sadələşdirilməsi, eləcə də readmissiya haqqında danışıqların davamı olaraq ölkə  vətəndaşlarının Avropaya vizasız getmələri məsələsinin  müzakirə ediləcəyini də  istisna etmir.

Leyla Tağızadə