Rusiya Arktik və Antarktika Araşdırmalar Mərkəzinin (AARİ) alimləri Antarktikada 3 min 700 metr dərinlikdə kəşf etdikləri Vostok gölündən götürdükləri 40 litrlik nümunəni Rusiyaya gətirərək araşdıracaq.

FaktXeber.com-un verdiyi məlumata görə, rusiyalı alimlərin 30 ildir davam edən işləri eramızadan əvvəlki dövrə aid buzların altındakı gölün aşkarlanmasıyla daha da sürətlənib və bu tapıntının başqa planetlərdəki analoji kəşflərə də yaşıl işıq yandıracaq. Moskvada laboratoriyalarda aparılacaq araşdırmalardan sonra milyonlarla il keçmişə aid gizli məlumatlar, iqlim dəyişiklikləri və canlı həyatla əlaqədar məlumatların aşkarlanması gözlənilir.

Ancaq rus alimlərin bildirdiyinə görə, gölün səthindən götürülmüş donmuş təbəqə, canlıların yaşaması üçün əlverişli olmaya bilər. 2014-cü ilə qədər davam etdiriləcək qazıntılarla gölün dibinə çatılması və daha böyük kəşflərin aparılması mümkün olacaq.

Qeyd edək ki, Vostok gölündən çıxacaq və eramızadan əvvələ aid bir qisim mikroorqanizmlərin yer üzünə yayılacağı narahatçılığı ilə 1998-ci ildə oxşar kəşfiyyat işləri gölə 130 metr qalmış dayandırılmışdı.

"Russia Today" televiziyasına açıqlama verən hidrobiyologiya mütəxəssisi Vasili Pajarvi, hədəflərinin buz qatlarını mümkün olduğu qədər daha dərin qazaraq 400 min ildən bəri qorunan hava qabarcıqlarına çatmaq və içindəki karbon 4 oksid həcmini ölçmək olduğunu söyləyib.

Dünyada 20 milyon il boyunca gizli qalmış başqa heç bir yerin olmadığını söyləyən AARİ rəhbəri Valeri Lukin isə, kəşfiyyat işlərini "bilmədiklərimizlə qarşılaşmaq" kimi təsvir edib.

İndi alimlər, xüsusi sterilizə olunmuş konteynerin içinə yerləşdirdikləri eramızdan əvvələ aid xəzinə ilə Rusiyaya dönürlər. Alimlər gölə robot göndərməyi də planlaşdırılar.

Xatırladaq ki, Vostok gölü, Antarktikadakı tapılmış təxminən 400 buzaltı gölün ən böyüyü və qoruq olanıdır. İlk dəfə 1959-1964-cü illər arasında aparılan seysmik araşdırmalar zamanı kəşf olunan və təxminən 15 min kvadrat kilometr əraziyə malik gölün üstündəki buz təbəqəsinin 400 min il, gölün özünün isə 20 milyon il yaşının olduğu bildirilir.

Aysel Məmmədova