Bakıda keçiriləcək Eurovision mahnı yarışmasına bir neçə ay qalmış, Almaniyanın məşhur TT1 kanalı Azərbaycan paytaxtında son zamanlar yaranmış gərgin vəziyyətlə bağlı geniş reportaj yayımlayıb. Telekanaldan bildiriblər ki, CrystalHall ətrafında aparılan çəkilişlərə polislər imkan verməyib. Hətta ən adi şəkillərin çəkilməsinə belə şərait yaradılmayıb. Nəzərə alsaq ki, qarşıdan gələn Eurovision mahnı müsabiqəsi zamanı ölkəmizə kifayət qədər müstəqil telekanallar gələrək reportajlar hazırlamaq istəyəcəklər, belə olan halda onlara hər hansı bir maneələr yaradılacaqmı? Mövzu ilə bağlı media eksperti Zeynal Məmmədli, FaktXeber.com-un suallarını cavalandırıb. 

- Zeynal bəy, Almaniyanın müstəqil telekanalı üçün qoyulan qadağalar, Eurovision mahnı müsabiqəsi zamanı digər telekanallar üçün də tətbiq oluna bilərmi?
- Çox təəssüf ki, “hə” cavabı verəcəm. Çünki söhbət təkcə Almaniyanın çox nüfuzlu kanalından getmir. Əgər hər hansı bir kanal bura gəlirsə, deməli onun güclü bir vəsaiti var və çoxlu nüfuzlu bir kanaldır. Digər tərəfdən, bu kanalın arxasında təkcə maliyyə imkanı yox, eyni halda siyasi güc və ictimai simpatiya durur. Ona görə ki, Almaniya reallığında telekanal kimi fəaliyyət göstərmək asan deyil. Onun üçün güclü rəqabət lazımdır. Yəni bu cür televiziyalara asanlıqla problemlər yaradırlarsa, aydın məsələdir ki, digər televiziyalara da yaradacaqlar. Bunun bariz nümunəsini Azərbaycan telekanallarında görmək mümkündür. Əgər baş verən həmin problemləri ölkə telekanalları işıqlandırmaq istəsəydi, buna imkan verməzdilər. Eurovision kimi tədbirlərin Azərbaycanda keçirilməsi iç üzümüzün açılmasına səbəb olacaq. Necə ki, xarici ölkələrdə qar yağanda az sayda olan çirkabın üzəri örtülür. Bizdə isə əksinə, qar yağanda bütün çirkablar üzə çıxır.

- Belə olan halda, Azərbaycanı hansısa beynəlxalq təzyiq gözləyə bilərmi? Bir halda ki, prezident bildirib ki, ölkədə mətbuat azadlığı mövcuddur.
- İnanmıram ki, tədbir dövründə açıq-aşkar şəkildə bu cür maneələr yaratsınlar. Bu bir az “nəzakətli” formada olacaq. İnanırlar ki, tədbir dövründə əsas diqqət müsabiqəyə yönəldiyindən, bu məsələlərə az diqqət edəcəklər. Eyni halda, həmin telekanalların ölkədəki problemlərlə bağlı hər hansı bir reportaj hazırlamaq üçün şərait və vaxtları olmayacaq. Həmin dövrdə sözsüz ki, bu cür çəkilişlərə cəhd ediləcək. Lakin bunun qarşısını açıq formada, yəni indiki şəkildə ala bilməyəcəklər.