FaktXeber.com-un verdiyi məlumata görə, Rusiyanın "Anji Mahaçqala" komandasında oynayan braziliyalı, doqquzuncu uşağının oğlan olacağı təqdirdə klub prezidenti Süleyman Kərimovun adını verəcəyini söyləyib. Karlos, oynadığı komandanın prezidenti ilə çox yaxşı münasibətlərinin olduğunu bildirib.
Reportajın bəzi hissələrini oxucularımıza təqdim edirik:

- Bir ildən artıqdır Rusiyadasınız, sizi ən çox təəccübləndirən şey nədir burada?
- Əslində təəccüblü şey elə də çox olmadı. Ancaq yollarda kifayət qədər avtomobilin olması və tıxaclar məni daha çox təəccübləndirdi.

- Burada nəyə alışa bilmədiniz?
- Soyuğa heç cür alışa bilmədim. Lakin uzun müddət Milanda qaldım və orada temperatur bəzi vaxtlarda mənfi 12 dərəcəyə düşürdü, burada isə mənfi 27 də ola bilir. İmkan tapdıqca Madridə getməyə çalışıram.

- Sizcə hansı rus oyunçu "Real Madrid" və ya "Barselona" komandasında oynaya bilər?
- Jirkov, Arşavin, Pavleçenko və hətta Vladimir Qabulov da ola bilər.

- "Anji"nin gələcəkdəki hədəflərindən bəhs edərsinizmi?
- Klub olaraq hədəflərimiz hər vaxt ən yüksək səviyyədədir. Qısaca desək, "Anji"nin 2 il ərzində dünyanın 2 və ya 3 komandasını sırasına daxil etməkdir.

- Komandanın yeni baş məşqçisi Yuri Krasnojan bu hədəflərə komandanı çatdıra biləcəkmi?
- Təbii ki, Krasnojan Rusiyada ən tanınmış məşqçilərdən biridir.

- Bir çox braziliyalı uşaq böyüdükdə ya Karlos, ya da Ronaldo olmaq istəyir. Bəs sizin uşaqlarınız?
- Hələ ki, bir şey söyləyə bilmərəm, amma oğullarımın futbolçu olacaqlarını hesab etmirəm. Amma istəyərdim ki, uşaqlarım vəkil, ya da professor olsun.

- Əgər oğulunuz olsa, klub prezidentinin adını qoyardınızmı?
- Təbii ki, ya Süleyman olar, ya da Kərim.

- Həyatda ən çox nədən qorxursunuz?
- Yəqin ki, ölümdən.

- Kişilərin hansı xarakterik xüsusiyyətlərini bəyənirsiniz?
- Səmimi olmalarını.

- Bəs qadınların?
- Ağıllı olamalarını.

- Futbolçu olmasaydınız kim olardınız?
- Yəqin vəkil. Ciddi duruşum sayəsində hesab edirəm bu peşə mənə çox yaraşardı (Gülür).

- Ən böyük çatışmazlığınız nədir?
- Yaxşı niyyətli olmağım, çox vaxt insanlar öz mənfəətləri üçün bu xüsusiyyətimi istifadə edə bilir.

- Ən çox xoşbəxt olduğunuz dövr?
- Karyeramı götürsək, hər şey mükəmməldir. Amma ən çox 1998-ci il Dünya Kubokunun final oyununda uduzduğumuz üçün kədərlənmişdim.

- Həyatınızda nəyi dəyişdirmək istəyərdiniz?
- Saçlarımın olmasını istəyərdim (Gülür).

Samir Əliyev