Dünya təcrübəsində belə görünüb ki, insan haqları pozulması, demokratiya və korrupsiya sahəsində problemi olan ölkələrdə islahatların aparılmaması həmin dövləti idarə edən hakimiyyətin məhvinə səbəb olub. Biz bunu Tunis, Misir və Liviyada şahidi olduq. Təbii ki, dediklərimizi ciddi islahatlara ehtiyacı olan Azərbaycan hakimiyyəti də gözəl anlayır. Bəs Azərbaycanda islahatların aparılmamsında kimlər maraqlıdır? Mövzu ilə bağlı FaktXeber.com-a açıqlama verən Müsavat Partiyasının başqan müavini Arzu Səmədbəyli maraqlı fikirlər səsləndirdi.

Tənəzzülə uğrayan ölkələrin bir-birilərindən ibratə götürmədiyini söyləyən başqan müavini, “Tunisdən sonra Misir və Liviya bir-birinin ardınca tənəzzülə uğradıqca, deyirdilər ki, bura Tunis deyil. Lakin nəticə etibarı ilə hamısı devrilməyə məhkum oldular. Çox paradoksal bir haldır ki, ölkələr bir-birilərindən nümunə götürmürlər. Diktatorların bəsirət gözləri bağlanıb”, - deyə bildirdi.

Ərəb ölkələrindəki proseslərin Azərbaycanda da baş verməsini istəmədiklərini qeyd edən Arzu bəy, İctimai Palata olaraq islahatlarla dəyişikliklərin həyata keçirilməsinin tərəfdarı olduqlarını bildirdi: ““İP olaraq demokratiyaya keçidin “Yol xəritəsi”ni hakimiyyətə, parlamentə və eyni halda ölkə başçısına təqdim etmişik. Təəssüflər olsun ki, bu günə qədər göndərdiyimiz sənədə heç bir reaksiya verilməyib.”

Başqan müavini sonra qeyd etdi ki, 1979-cu ildə İranda inqilab baş verməmişdən qabaq müxalifət tərəfindən iqtidara islahatlar paketi təqdim olunmuşdu və şah həmin dövrdə müxalifətin təklifini ironiya ilə qəbul edilmişdi: “Lakin inqilab baş verdikdən sonra şah bütün təklifə razılığını bildirməsinə baxmayaraq, xalq qəbul etmədi. Azərbaycanda da belə bir halın baş verməsi mümkündür.”

Xalqın mənafeyini və rifahını nəzər alaraq ölkədə hər hansı bir qanlı inqilabın tərəfdarı olmadıqlarını qeyd edən Arzu bəy, “bizim məqsədimiz ölkəni korrupsiya və rüşvətdən və eyni halda insan haqlarının kobud şəkildə pozulmasından islahatlarla təmizləməkdir. Azərbaycan hakimiyyəti hələ ki, islahatlara hazır görünmür. Amma dünyada gedən prosesləri də görməzlikdən gəlmir. Sonuncu dəfə BMT-də Suriyanın əleyhinə səs verməsi hakimiyyətin getdikcə gerçəkləri görməsindən xəbər verir. Ölkədə olan bütün problemlərin həll olunması üçün Azərbaycan hakimiyyətinin iradəsi lazımıdır ki, biz hələlik həmin iradəni görmürük” , - deyə qeyd etdi.