Yeni Azərbaycan Partiyasının icra katibinin müavini Siyavuş Novruzov, müxalifət partiyalarını maliyyə hesabatları təqdim etməyə çağırıb. O bildirib ki, Azərbaycanın hakim partiyası hər il öz illik hesabatını, o cümlədən maliyyə hesabatını açıqlayır. “Biz maliyyə hesabatını açıqlamaqla siyasi partiyalara nümunə göstəririk. Müxalifət partiyaları da haradan maliyyələşdikləri ilə bağlı öz hesabatlarını göstərməlidirlər.”

Hakim partiyadan səslənən fikirlərlə bağlı FaktXeber.com-a açıqlama verən AXCP-nin sədr müavini Fuad Qəhrəmanlı, müxalifət partiyalarında hər hansı bir maliyyə əməliyyatının aparılmadığını bildirdi: “Hazırda ölkədə olan partiyalar könüllülük prinsipi əsasında fəaliyyət göstərirlər. Çünki ölkədə elə bir vəziyyət yaradılıb ki, müxalifət partiyasına hər hansı bir yardım göstərən şəxs və ya qurum həmin halda hakimiyyətin hiddəti ilə üzləşərək məhv edilir.”

YAP-ın büdcə təşkilatları və hakimiyyətin məcburi ödənişləri hesabına maliyyələşdiyini qeyd edən Fuad bəy, bu prosesin ölkədə korrupsiyanın bir elementinə çevrildiyini bildirdi: “Hakim partiya korrupsiya və əhalinin talan olunmuş var-yoxu hesabına maliyyələşir. Onların hesabatları bəzi vaxtlar formal xarakter daşıyır. Ümumiyyətlə onların üzvləri də formal xarakter daşıdığına görə, onlar tərəfindən ödənişlərin olması və guya partiyanın maliyyə fondunun həmin üzvlərin ödənişləri hesabına formalaşması haqqında səsləndirilən fikirlərin hamısı blefdir.”

Sonda Fuad bəy bildirdi ki, vətəndaşların əmək haqları verilməmişdən öncə büdcə təşkilatları vəsaitləri ayırıb Yeni Azərbaycan Partiyasının büdcəsinə köçürür: “Bu da həmin partiyaların ölkədəki talançılıq siyasətinin tərkib hissəsidir. Ona görə də açıqlanan bu hesabatlar heç nəyi ifadə etmir. Əksinə, guya onlar bu yolla yalançı və korrupsioner fəaliyyətlərini ört-basdır etməyə çalışırlar. Yəqin ki, Siyavuş Novruzovun özü də açıqlanan hesabatın həqiqiliyinə  və şəffaflığına inanmır.”