Azərbaycan hakimiyyəti BMT Təhlükəsizlik Şurasında Suriya prezidenti Bəşər Əsədin təcili istefa verməsi ilə bağlı müddəanın əks olunduğu qərar layihəsinin lehinə səs verib. Lakin bundan öncə Liviya və Misir diktatorlarının devrilməsi zamanı Azərbaycan tərəfi analoji addımlar atmamışdır. Azərbaycan hakimiyyətin Suriya ilə bağlı atdığı addım nə ilə bağlıdır?

Mövzu ilə bağlı FaktXeber.com-a açıqlama verən Şərq-Qərb Araşdırmalar Mərkəzinin sədri Ərəstun Oruclu, Azərbaycan tərəfinin Suriya hakimiyyəti ilə bağlı atdığı addımını məntiqli olduğunu bildirdi: “Çünki əvvəllər bu cür hadisələr başqa ölkələrdə baş verəndə Azərbaycan hakimiyyəti az qala Qəzzafinin, Mübarəkin siyasi meyitlərinin müdafiəsinə qalxırdılar. Eyni halda ölkənin daxilində elə təbliğat aparırdılar ki, sanki Azərbaycan hakimiyyəti diktatorların vəkilləridir. Görünür ki, hadisələr reallaşaraq Azərbaycana yaxınlaşdıqca hakimiyyət daha da praqmatik olur.”

Sonra Ərəstun bəy bildirdi ki, hakimiyyət bir il və 6 ay bundan əvvəlki mövqeyi sərgiləməklə özünü bir qədər çətinə saldığını başa düşür: “Lakin mən burada hər hansı bir məntiq görmürəm. Bu o demək deyil ki, hakimiyyətin mövqeyində hər hansı bir yumşalma müşahidə olunaraq dəyişiklik baş verib. Görünür hakimiyyət artıq prosesin mahiyyətini dərk etməyə başlayıb. Çox gözəl anlayırlar ki, Bəşər Əsədin bu gün müdafiə edilməsi sabah üçün öz növbəsini sürətləndirilməsinə səbəb ola bilər. Eyni halda Suriya hakimiyyətinin əleyhinə verilən qərara dəstək verməklə öz növbələrini gecikdirmək istəyirlər.”

“Hakimiyyətin mövqeyində hər hansı bir yumşalma müşahidə edilsəydi, öz xalqına qarşı münasibəti dəyişərdi. Lakin biz hər hansı bir yumşalma və mülayimlik hiss etmirik”, - deyə politoloq əlavə etdi.

Xəyal Şükür