Avropa Xarici Əlaqələr Şurasının “Avropanın xarici siyasət göstəriciləri-2012" adlı hazırladığı hesabatında məlum olub ki, Avropa İttifaqının son 10 ildə Qarabağ münaqişəsinin nizamlanmasına yönələn səyləri heç bir nəticə verməyib. Aİ-nın ekspertləri etiraf ediblər ki, Brüsselin səylərinin tamamilə iflasa uğradığı bir vaxtda Azərbaycanla Ermənistan arasında gərginlik artıb və Aİ-nin Qarabağ münaqişəsinin nizamlanmasına təsir imkanları məhduddur.
Qərbin də münaqişə ilə bağlı gücsüzlüyünü etiraf etdiyini nəzərə alsaq, bundan sonra Qarabağın taleyi necə olacaq? Mövzu ilə bağlı FaktXeber.com-a açıqlama verən Ziyalılar Forumunun üzvü Cəmil Həsənli, maraqlı fikirlər səsləndirib.

Hazırda Qarabağ münaqişəsinin taleyi ilə bağlı heç kəsdə hazır reseptin olmadığını qeyd edən Cəmi Həsənli, Azərbaycanın müxtəlif beynəlxalq toplantı, görüşlər və konfranslarda özünə aid olan hüquqları beynəlxalq təşkilatlara verməklə çox ciddi səhvə yol verdiyini bildirdi: “Azərbaycan tərəfi bu cür addımlarla münaqişənin həll edilməsi ilə bağlı imkanlarını məhdudlaşdırdı. İstər Minsk Qrupu, istər Avropa Birliyi, istərsə də digər beynəlxalq təşkilatlar bu müddət ərzində bir şey edə bildilər. Onlar Azərbaycanın boynuna qoydular ki, münaqişə dinc yolla həll olunacaq.”

Lakin bu müddət ərzində Ermənistanın işğalçı olması və işğal etdiyi torpaqlardan geri çəkilməsi ilə bağlı hər hansı bir addımın atılmadığını söyləyən Cəmil bəy, “həmin təşkilatlar bu siyasətlə işğala bəraət qazandırıblar”, - deyə qeyd etdi: “Bu baxımdan münaqişənin həllinin beynəlxalq təşkilatlara təhvil verilməsi Azərbaycan üçün ziyanla nəticələndi. Uzun müddət Azərbaycan ictimaiyyətinin bu məsələyə yaxın buraxmadılar ki, münaqişə ilə bağlı ölkənin ali orqanları məşğul olur. İndi də məlum olub ki, onların səyləri heç bir nəticə verməyib.”

Cəmil bəy 20 il müddətində aparılan danışıqlar nəticəsində işğal olunmuş torpaqlarımızın 20 metrinin belə qaytarılmadığını qeyd edərək, aparılan siyasətin özünü doğrultmadığını bildirdi: “Münaqişənin həllinə cavabdeh olan qurumlar, ölkənin potensialını bu istiqamətdə hərəkətə gətirməlidirlər. Eyni halda işğal altında torpaqların azad olunması ilə bağlı alternativ yollar axtarılmalıdır.”

Xəyal Şükür