Fransa prezidenti Nikola Sarkozi bildirib ki, qondarma erməni soyqırımı ilə bağlı qanun Konstitusiya Məhkəməsi tərəfindən ləğv olunsa qanunu növbəti dəfə göndərəcəm. Artıq Nikola Sarkozi türklərə qarşı düşmənçiliyini bir daha ən yüksək formada izhar etdi. Mövzu ilə bağlı FaktXeber.com-a açıqlama verən Sabir Rüstəmxanlı suallarımızı cavablandırıb.  

- Sabir bəy, bundan sonra Azərbaycan analoji olaraq hansı addımlar atmalıdır? 
- Azərbaycan Fransaya qarşı əlində olan imkanların böyük bir qismindən istifadə edib. Azərbaycanın rəsmi dairələri, QHT-ləri və ictimaiyyət nümayəndələri müxtəlif formalarda bu məsələyə öz münasibətlərini bildirərək səfirliyin qarşısında etiraz aksiyaları keçirdiblər. Sadəcə olaraq Sarkozi ya müəyyən qüvvələrin əsiridir, ya da ki, türklərə qarşı olan şəxsi duyğularının əsiri olub. Ola bilsin Türkiyə-İsrail münasibətləri pozulduqdan sonra Sarkozi müəyyən yəhudi dairələrinin təsiri ilə hərəkət edir. Hər halda Fransa tərəfindən atılan addımlar açıq-aşkar türk düşmənçiliyinə qarşı yönəlib. Ona görə də bu məsələ ilə bağlı Azərbaycan və Türkiyənin diaspor təşkilatları ciddi şəkildə mübarizə aparmalıdırlar. Eyni halda, Fransanın Minsk Qrupunun həmsədrlərindən biri kimi qalması qətiyyən yol verilməzdir. 

 - Qarşıdan Xocalı soyqırımının il dönümü gəlir. Fransa tərəfindən atılan bu addımı nəzərə alsaq, Azərbaycan tərəfi Xocalı hadisəsinın törədilməsində birbaşa rolu olan Ermənistan prezidenti Serj Sarkisyanı, eks-prezident Köçəryanı və Qukasyanı rəsmi olaraq cinayətkar elan edə bilərmi? Onu da qeyd edək ki, Prokurorluğun hazırladığı siyahıda Xocalı faciəsində birbaşa iştirak edən bu şəxslərin adı yoxdur.
-  Prokurorluğun hazırladığı siyahı haqqında məlumatım yoxdur. Ölkənin rəsmi dairələri bu məsələyə öz münasibətlərin bildirməlidirlər. Bu məsələ ilə bağlı səsləndirilən müxtəlif fikirlər bir-birilərinə maneə törətməməlidir. Nə qədər bu məsələ ilə bağlı səsləndirilən fikirlər aparılan mübarizə cəbhəsi geniş olsa, bir o qədər yaxşıdır.

- Fransanın qondarma erməni soyqırımı ilə bağlı qəbul etdiyi qanuna adekvat olaraq Azərbaycan tərəfi Xocalı soyqırımı ilə bağlı qanun layihəsi qəbul edə bilərmi?
- Şübhəsiz biz belə bir qanun layihəsi qəbul edə bilərik. Xocalı soyqırımı olmayan müddətə qədər, yalnız ermənilər özlərini soyqırıma məruz qalan ölkə kimi göstərirdilər. Mənə elə gəlir ki, bu məsələ ilə bağlı  ilkin olaraq Türkiyə addım atmalıdır. Türkiyə Fransanın Əl-Cəzairdə törətdiyi qırğınlarla bağlı parlamentində qanun layihəsi qəbul edə bilər. Fransa Qurtuluş müharibəsində Türkiyəni tamamilə parçalayaraq məhv etmək istəyirdi. Dünyaya bunu çatdırmaq lazımdır ki, Fransanın rəyinin Türkiyəyə heç bir aidiyyəti yoxdur.