Artıq bir neçə müddət ki, ölkənin tanınmış ziyalılarının toplandığı Ziyalılar Forumu təsis olunub. Qurum yarandığı gündən etibarən ölkə ictimaiyyətində kifayət qədər rezonans doğuran fəaliyyət ilə yadda qalıb.

Bəs görəsən forum öz fəaliyyəti ilə ölkənin ictimai-siyasi həyatında müsbətə doğru hər hansı bir dəyişiklik edə bilərmi?

Mövzu ilə bağlı FaktXeber.com-a açıqlama verən hüquqşünas Qurban Məmmədov, cəmiyyətdə olan istənilən canlanmanın situasiyaya təsir etdiyini bildirdi: “Ziyalıların fəaliyyəti bu canlanmaya daha çox təsir edir. Müxalifət partiyalarının nüfuzunu itirdiyi, satıldığı və adları olub, özlərinin mövcud olmadığı bir zamanda müxalifətin real gücü yoxdur ki, rejimə qarşı hər hansı bir mübarizə aparsın. Lakin ziyalıların atdıqları hər bir addım cəmiyyətdə çox böyük rezonans doğurur və millətin ruhunun oyanmasına ciddi təsir göstərir”.

Qurban bəy foruma qarşı kampaniyanın başlamasının təbii bir hal olduğunu xüsusi vurğuladı: “Rejimdən bundan başqa nə gözləmək olar?! Deməlidirlər ki, “bəh-bəh, nə yaxşı bizim tərbiyəsizliyimizi və rüşvətxorluğumuzu söyləyirsiz”. Bu kampaniya rejimin mahiyyətindən doğan hərəkətlərdir. Gözümüzü açandan belə görmüşük ki, düz söz deyənin ağzından vuraraq həbs ediblər. Hətta ailə münasibətlərinə müdaxilə etməkdən belə çəkinmirlər. Diktatura rejimlərinin hamısının idarəçiliyi bu cürdür. Bunu təbii qəbul edərək dözmək və mübarizə aparmaq lazımdır».