Ermənistan Milli Akademiyasının Şərqşünaslıq İnstitutunun direktoru Ruben Safrastyan ehtimal olunan İran-ABŞ müharibəsindən danışarkən bildirib ki, “ABŞ-ın İrana hərbi müdaxiləsi Azərbaycanın bundan istifadə edərək Dağlıq Qarabağda hərbi əməliyyatlara başlamasına gətirib çıxaracaq”.

Azərbaycanın müharibə etməsi ilə bağlı deyilənlər nə dərəcədə real görsənir? Azərbaycan tərəfi belə bir addım ata bilərmi? Məsələ ilə bağlı FaktXeber.com-a açıqlama verən politoloq Zərdüşt Əlizadə, Ruben Safrastyanın yanlış düşündüyünü bildirdi: “Safrastyan sadəcə olaraq Azərbaycan rəhbərliyini və hakimiyyətini yaxşı tanımayıb. Azərbaycan rəhbərliyi üçün əsas məsələ neft alveridir. Neft qurtardıqdan sonra qaz satacaqlar.”

Qarabağda müharibə başlayacağı halda hakimiyyət üçün gözlənilməz dəyişiklərin baş verəcəyini söyləyən politoloq, “müharibənin baş verməsi hakimiyyətin sarsılmasına gətirib çıxardacaq”, - deyə qeyd etdi: “Hakimiyyətin müharibəyə başlaması Qərbin və Rusiyanın ona qarşı münasibətinin dəyişməsinə səbəb ola bilər. Ona görə də, nəylərinə lazımdır ki, müharibə etsinlər. Qarabağla bağlı boğazdan yuxarı istənilən qədər vətənpərvər şüarlar səsləndirə bilərlər. Lakin heç vaxt müharibə etməyəcəklər.”

Zərdüşt  bəy orduya külli miqdarda pulların ayrılmasında əsas məqsədin onları oğurlamaq olduğunu vurğulayaraq, həmin pulların yarısını ciblərinə ötürdüklərinə söylədi: “Ona görə də Safrastyan tamamilə yanlış fikirləşir. Ürəklərini sakit saxlasınlar. Nə qədər ki, Azərbaycan bu hakimiyyəti idarə edir, Qarabağ naminə heç bir addım atılmayacaq.”

Xəyal Şükür