Bakı şəhər sakini Hüseyn Sadıqov redaksiyamıza ünvanladığı məktubda Daşınmaz Əmlak İdarəsinə “Forma N:1” arayışı üçün etdiyi müraciətdən və sözgüdən idarənin süründürməçilyindən yazır. Məktubda deyilir:

“Salam hörmətli redaksiya.
Bir çox Bakı sakinləri kimi, mən də şəxsi mülkiyyət sahibiyəm. 2005-ci ilin sentyabr ayında şəxsi evimi tikdirdikdən sonra Bakı şəhər İH Texniki İnventarlaşdırma və Mülkiyyət Hüquqlarının Qeydiyyatı İdarəsindən Qeydiyyat Vəsiqəsini  (kupça deyənlər də var) aldım. Qeydiyyat Vəsiqəsini almaq üçün dövlət orqanlarının tələb etdiyi bütün sənədləri təqdim edərək, tələb olunan məbləğdə pulu ödəyərək almışam. Sonradan özüm və ailə üzvlərim Qeydiyyat Vəsiqəsində göstərilən ünvana pasport (kimlik) qeydiyyatına alındıq. 2005-ci ildən noyabr 2011-ci il tarixinə kimi evimizin Qeydiyyat Vəsiqəsindən istifadə etməmişik. Sadəcə bir sənəd olaraq saxlayırıq.
2011-ci ilin noyabr ayında Bakı şəhərində yerləşən Banklardan birindən pul (kredit ) götürmək məqsədi ilə müraciət edəndə, bildirdilər ki, Bakı şəhər Daşınmaz Əmlakın (BT) Qeydiyyatı İdarəsindən Forma N:1 arayışı alıb Banka təqdim etdikdən sonra Bank kreditə pul verir.
Mənə verilmiş Qeydiyyat Vəsiqəsinə arxayın olaraq Daşınmaz Əmlak İdarəsinə müraciət etdim və məlum oldu ki, Qeydiyyat Vəsiqəsinin adını dəyişib ÇIXARIŞ qoyublar. Gərək mən birinci növbədə Qeydiyyat Vəsiqəsinin adını dəyişdirməliyəm, sonra isə Forma N:1 arayışı üçün müraciət edəm. Bəli, Daşınmaz Əmlak İdarəsinə müraciət etdim. Çox əfsuslar olsun ki, həmin idarədə işləyən məmurlar məni get-gələ salıblar. Üç aydır ki, cürbəcür bəhanələrlə mənə ÇIXARIŞ deyilən sənədi vermirlər.
Belə olan halda, bankın mütəxəssisinə yaxınlaşıb sənədlərlə tanış etdim. Vəziyyətin nə yerdə olduğunu bildirdim. Sonra isə bank mütəxəssisinə bu cür sualla müraciət etdim: “Özünüz yaxşı bilirsiniz ki, bütün sənədlərin surətinin təsdiqi, vətəndaşlar arasında olan müqavilələr, vətəndaşlarla dövlət orqanları arasında bağlanan müqavilələr Dövlət Notarial Kontorunda yazılı surətdə təsdiq olunur və bu sənədlər hüququ qüvvəsini saxlayır. Belə olan halda sizə bir bank olaraq evimin bütün sənədlərini Notarial qaydada təhvil verim və sizdən krediti alım. Lazımdırsa bir neçə qonşunun da iştirakını sübut üçün təşkil edim. Əgər siz mənim bu təklifimi qəbul edə bilərsinizsə bu halda Daşınmaz Əmlak İdarəsinin verəcəyi Forma N:1 arayışına ehtiyac qalmır, digər tərəfdən vətəndaşlar məmur özbaşınalığından az da olsa rahat nəfəs ala bilir.,,

Bankın əməkdaşı sənədlə tanış oldu və məni dinlədikdən sonra bildirdi ki, Mərkəzi Bank bütün banklara göstəriş verib ki, Forma N:1 arayışı olmayan halda böyük məbləğdə kredit verilməsin.

Hörmətli redaksiya, özünüz də yaxşı bilirsiniz ki, Forma N:1 arayışını almaq istəyən vətəndaşlar arayışı aşağıdakı məqsəd üçün alırlar.

1. Vərəsəlik hüququnun verilməsi üçün
2. Mülkiyyəti satmaq üçün
3. Kredit almaq üçün

Mənim düşüncəmə görə, Forma N:1 arayışı o deməkdir ki, vətəndaşın istifadəsində olan mülkiyyət nə satılıb, nə də girov qoyulub. Belə olan halda nə üçün Daşınmaz Əmlak İdarəsinin əməkdaşları vətəndaşları bu qədər nahaqdan get-gələ salırlar?

Bəlkə mən səf fikirləşirəm.

P.S. Obyektivlik naminə qarşı tərəfin də fikirlərini dərc etməyə hazırıq.