Hüquqşünas Xəyalə Mustafayeva qarşılaşdığı korrupsiya faktları ilə bağlı Faktxeber.com-a açıqlama verib. Onun bildirdiyinə görə, 2011-ci ilin oktyabr ayının 1-dən başlayaraq müqavilə əsasında “İNTERNATİONAL UNİVERSAL MARKETİNG COMPANY” MMC şirkətində işə başlayıb. Adı çəkilən şirkətin prezidenti Məmmədov Vüqar Arzu oğlu ilə əmək müqaviləsi bağlayıb. Müqaviləyə əsasən bir il müddətində hər ay 150 (yüz əlli) AZN əmək haqqı almaq şərti ilə bu şirkətdə marketinq meneceri vəzifəsində işləməli imiş.
Başına gələn hadisələrin davamını isə Xəyalə xanım belə nəql edir: “19 noyabr 2011-ci ildə şirkətin rəhbərliyi mənə və məndən başqa 20 nəfərə yaxın işçiyə xəbər verdi ki, icarəyə götürdüyü AMAY ticarət mərkəzinin 5-ci mərtəbəsindəki otaqların icarə haqqı bahalaşdığından məcburiyyət qarşısında başqa yerə köçməliyik. Bir həftəlik şirkətin hesabına bizə tətil elan etdilər və dedilər ki, bir həftə müddətində sizə telefonla xəbər verib yeni iş yerinin ünvanını bildirəcəyik. Bir həftə sonra bizə məlum oldu ki, Şirkət rəhbərliyi Moskva şəhərinə qaçıb, heç bir telefona, emailə cavab vermir və məlum ünvanlar yanlış imiş. Mən və başqa işçilər baş vermiş əməllər haqqında DİN-in 102 xidmətinə məlumat verdik və onların tövsiyəsi əsasında Xətai RPİ-nin 37-ci PB-nə ərizə ilə müraciət etdik. Şikayətimizə baxılmadığından Xətai rayon Prokuroruna şikayətlə müraciət etdik. Prokurora yazdığımız şikayətə izahat yazanda olmuş hadisələri göstərdik. Yığılmış materiallar cinayət işinin başlanması üçün Bakı şəhər Prokurorluğuna göndərildi və bizə məlumat verildi ki, dələduzluq və aldatma faktları üzrə çinayət işi başlanıb, istintaq Xətai RPİ-nin müstəntiqi Vüsal Şahbazova tapşırılıb.
Şikayətimizə əsas olan səbəb isə bunlardır: Şirkətin prezidenti ilə müqavilə bağladıqdan sonra, işə başlayan günü özünü kadrlar üzrə müdir kimi təqdim edən Hüseynov Əlizamin Yavər oğlu, məndən 2000 (iki min) AZN pul istədi ki, həmin bu məbləğ şirkətin fonduna keçirilməlidir. Pulu verməyəcəyim təqdirdə işdən azad olunacam. Mənə məlum oldu ki, bu məbləğ bütün işçilərdən alınıb və mən də həmin məbləği ödəməli oldum, çünki mənimlə işləyən həmin 20 nəfərə qədər işçilər arasında bu məbləğin şirkətin payçısı kimi ödənildiyi haqqında məlumat gəzirdi.
Mən orada işlədiyim müddətdə 100$ avans və 39 AZN əmək haqqı aldım. Məlumat üçün bildirirəm ki, bizim əmək müqaviləmizdə 150 (yüz əlli) AZN göstərilər ki, dövlətə vergi az verilsin, lakin sizin əmək haqqınız 400 (dörd yüz) AZN olacaq və 2012-ci ilin yanvar ayından əmək haqqınız 600-700 (altı yüz, yeddi yüz) AZN olacaq.
İnzibati orqanlar bu işin araşdırmasını uzadırlar və bəhanə kimi həmin şəxslərin axtarıldığını göstərirlər. Lakin həmin insanlar günü bu gün də rahat şəkildə Bakıda yaşayırlar. Onların indiki yaşadıqları və olduqları yerlərin ünvanlarını biz polisə dəfələrlə bildirmişik. Onlar isə cavab vermək istəmirlər, vaxtı uzadıb cinayət törətmiş şəxsləri məsuliyyətdən qaçırırlar”.
Cəfər Talıb
