ADP mətbuat xidmətindən FaktXeber.com-a daxil olan məlumata görə, toplantıda ölkədə və beynəlxalq aləmdə baş verən ictimai-siyasi proseslər əsas müzakirə obyekti olub. Toplantı iştirakçıları ilk növbədə Fransa senatında qondarma “erməni soyqırımı”nı inkar edənlərə cəza tətbiq edilməsini nəzərdə tutan qanun layihəsinin qəbul edilməsi faktını bir daha pisləyib və heç bir tarixi əsası olmayan və beynəlxalq məhkəmə sənədinə söyknməyən belə bir qərarın verilməsini Fransa yönətiminin ermənipərəst mövqeyindən irəli gəldiyini bildirib və bu faktın fundamental insan hüquqları sırasına daxil olan söz və ifadə azadlığının  kobud şəkildə pozulması kimi dəyərlədirib.

İdarə Heyəti üzvləri AŞ PA-nın qış sessiyasında qəbul edilən “İnsan haqlarının pozuntusu olaraq icbari deportasiya” adlı qanun layihəsinə edilən dəyişikliyin bundan sonra Fransada yaşayan türk vətəndaşlarına “erməni soyqırımını” inkar etməsinə görə deportasiya olunmamaq təminatı verməsindən məmnun olduğunu ifadə edib və bu faktı türk diplomatiyasının uğuru kimi dəyərləndirib.

İdarə Heyəti üzvləri tanınmış kinodramaturq, ictimai xadim R.İbrahimbəyovun Fransa Senatının söz və ifadə özgürlüyünə qarşı yönələn qondarma “erməni soyqırımı” ilə bağlı qəbul etdiyi ədalətsiz qərara etiraz olaraq adı çəkilən ölkənin ona verdiyi “İnncəsənət”ordenindən imtina etməsi və Azərbaycan-Fransa mədəni əlaqələr icmasının prezidentliyindən istefa verməsini, həmçinin Azərbaycan milli kulinariyasının prezidenti T.Əmiraslanovun ona təqdim edilən ödüldən imtina etməsini əsl vətəndaş mövqeyi kimi qiymətləndirib və bu cür  mövqenin Fransa ilə bağlılığı olan digər vətəndaşlarımız tərəfindən davam etdirilməsinin vacibliyini diqqətə çatırıb.

İdarə Heyəti üzvləri həmçinin hakimiyyəti Fransa parlamentində qəbul edilən və nəinki Türkiyənin, eləcə də Azərbaycanın əleyhinə yönəlmiş bu qərara kəskin təpki göstərməyə, iqtisadi siyasi resursların imkan verdiyi qaydada sanksiyalar tətbiq etməyə və nəhayət ermənipərəst mövqe nümayiş etdirən Fransanın ATƏT-in Minsk qrupundakı fəaliyyətini başqa bir dövlətlə əvəzlənməsi üşün təşəbbüs göstərməyə çağırıb.

Azərbaycan və Ermənistan dövlət başçılarının Rusiya prezidenti D.Medvedevin patronajlığı altında Soçidə keçirdiyi görüşün nəticələrinə münasibət bildirən İdarə Heyəti üzvləri bu məsələdə heç bir nailiyyət əldə edilmədiyini və görüşün yalnız protokol xatirnə keçirildiyini qeyd etməklə  təkcə Rusiyanın dominantlığı ilə keçirilən görüşlərin bundan sonra da heç bir fayda verə bilməyəcəyini diqqətə çatdırıb.

İdarə Heyəti üzvləri soyuqların başlaması və yağıntıların artması nəticəsində Bakı şəhərində və digər bölgələrdə yaranan gərginliklərdən, yolların buz qatı ilə örtülü qalması nəticəsində qəzaların sayının artmasından və əhalinin işıq və qaz ehtiyatlarından məhrum olmasından narahat olduğunu bildirib və bunu hakimiyyətin qış mövsümünə hazır olmaması və aidiyyati orqanların öz vəzifələrinə məsuliyyətlə yanaşmaması faktı ilə bağlı olduğunu diqqətə çatdırıb və ölkə rəhbərliyini vətəndaşların təbii hadisələrdən doğan təhlükəsizliyinin qorunması üçün tədbirlər görməyə çağırıb.

İdarə Heyəti üzvləri  son vaxtlar fermer təsərrüfatı ilə məşğul olan şəxslərin qarşılaşdığı problemlər onların istehsal etdiyi kənd təsərrüfatı mallarının əcnəbi ölkələrdən ucuz qiymətə və əyri yollarla gətririlən mallar hesabına satışının aşağ düşməsində, istehsal etdiyi malların əllərində qalmasından narahat olduğunu bildirib və dövlət başçısını ölkədə monopolist siyasətə son qoymağa və azad bazar  iqtisadiyyatının inkişafına stimul verən addımlar atmağa çağırıb.

İdarə Heyəti üzvləri Azərbaycan Cümhuriyyətinin qurucularından biri, görkəmli ictimai-siyasi xadim M.Ə.Rəsulzadənin anadan olması  ilə bağlı xalqımızı təbrik edib və onun xalqımız qarşısında göstərdiyi misilsiz xidmətləri bir daha dəyərləndirib. Qeyd olunub ki, böyük öndər və istiqlal mücahidi M.Ə.Rəsulzadə bütün şüurlu həyatını Azərbaycanın müstəqilliyi və suverenliyinin gerçəkləşməsi, onun bir dövlət kimi beynəlxalq aləmdə tanınması və türk-müsəlman şərqində ilk demokratik respublikanın yaradılmasına həsr edib. O, ömrünün mühacirətdə keçən qalan ömrünü də Azərbaycanın yenidən öz istiqlalına qovuşması yolunda mübarizəyə həsr edən və “Bir dəfə yüksələn bayraq, bir daha enməz!” ideyasına axıra qədər sadiq qalan bir mücahid kimi daim xatirələrdə yaşayacaq. İdarə Heyəti üzvləri mövcud hakimiyyətin xaqımız qarşısında bu qədər tarixi xidmətləri olan böyük dövlət xadiminin xatirəsinin əbədiləşdirilməsi və layiqincə qiymət verilməsi istiqamətində lazımi tədbirlər görülməməsindən təəssüfləndiyini bildirib və dövlət başçısını müstəqil dövlətimizin ilk banisi olan M.Ə.Rəsulzadəyə qarşı olan ayrı-seçkiliyə son qoymağa çağırıb.

Emin Nəsirli