ŞƏRQ TƏRƏFDAŞLIQ PROQRAMININ VƏTƏNDAŞ CƏMİYYƏTİ FORUMU NÖVBƏTİ TOPLANTISI BAKIDA OLACAQ
30-01-2012 / 13:20
Yanvarın 26-27-də Brüsseldə Avropa İttifaqının Şərq Tərəfdaşlıq Proqramının Vətəndaş Cəmiyyəti Forumunun İdarə Heyətinin iclası keçirilib. İclasda Azərbaycan Vətəndaş Cəmiyyətinin nümayəndələri, Forumun İdarə Heyəti üzvləri Vuqar Bayramov və Qubad İbadoğlu iştirak ediblər.
FaktXeber.com-un verdiyi məlumata görə, İdarə Heyətinin toplantısında aparlmış müzakirələr və verilmiş qərarlarla bağlı açıqlama verən Vətəndaş Cəmiyyəti Forumunun Azərbaycan üzrə Milli Əlaqələndiricisi Qubad İbadoğlu bildirib ki, iki gün davam edən toplantı bütün üzvlərin iştirakı ilə keçirilib, məhsuldar olub və əhəmiyyətli qərarlarla yadda qalıb. Belə ki, ilk növbədə Poznan Forumunun qərarlarının icrası istiqamətində müzakirələr keçirilib. Bununla əlaqədar olaraq İdarə Heyətinin Katibliyinin yaradılması, İdarə Heyətinin həmsədrlərinin seçilməsi, işçi qrupların toplantılarının və növbəti Forumun yeri və vaxtının dəqiqləşdirilməsi məsələləri müzakirə olunub. Qərara alınıb ki, Forumun Katibliyi Belçıkada qeydiyyatdan keçirilsin və onun qərargahı Brüsseldə fəaliyyət göstərsin. Eyni zamanda səsvermə nəticəsində Jeff Lovitt və İqor Kogut Forumun İdarə Heyətinin həmsədrləri seçilib. İdarə Heyəti qərara alıb ki, 4-cü Vətəndaş Cəmiyyəti Forumu noyabrın 29-30-da İsveçdə Stokholmda keçirilsin. Növbəti Forumla əlaqədar olaraq Şərq Tərəfdaşlıq Proqramına üzv ölkələrin vətəndaş cəmiyyətlərindən ərizələrin qəbuluna mayın 1-dən start veriləcək.
İdarə Heyətinin toplantısında Şərq Tərəfdaşlıq Proqramının Yol Xəritəsinin konturları, flaqman layihələri, Katibliyin Əsasnaməsi və digər vacib sənədlər də müzakirə edilib. Heyət üzvləri həmçinin Avropa Parlamentinin üzvü, Şərq Tərəfdaşlıq Proqramına üzv ölkələrdə vətəndaş cəmiyyətinin gücləndirilməsi sahəsində həmməruzəçi İlliana Lotova və Avropanın genişləındirilmsi üzrə komissar Stefan Füle ilə görüşüblər. Görüşlər zamanı Şərq Tərəfdaşlıq Proqramına üzv ölkələrdə seçkilər, siyasi partiyalar, media, vətəndaş cəmiyyəti institutları və azlıqlar mövzusunda milli əlaqələndiricilərin məlumat xarakterli çıxışları olub. Azərbaycandakı vəziyyətin müzakirəsi zamanı vicdan məhbusları və media azadlığı, xüsusilə də yerli TV-lərin və xarici radioların fəaliyyəti daha çox diqqət mərkəzində olub.
Forumun İdarə Heyəti növbəti toplantısının aprelin 4-5-də Bakıda keçirilməsinə qərar verib.
Dizayn :Networkbil.net . 2009 FAKTXƏBƏR . Dərc olunan materilların mətninə görə, redaksiya heç bir məsuliyyət daşımır. Saytdakı materiallardan istifadə edərkən istinad zəruridir.