Bir aya yaxındır Milli Dövlətçilik Partiyasının (MDP) həbsdəki sədri Nemət Pənahlının ailəsinin yaşadığı mənzilin elektrik enerjisi kəsilib. Buna səbəb Pənahlılar ailəsinin 1100 manat elektrik enerjisi borcu olduğu bildirilir.
N.Pənahlı ötən il iyunun 17-də Nəsimi Rayon Məhkəməsinin qərarı ilə 6 il müddətinə azadlıqdan məhrum edilib. Onu Cinayət Məcəlləsinin 221.3-cü (silahdan və ya silah qismində istifadə edilən əşyaları tətbiq etməklə xuliqanlıq və qəsdən sağlamlığa az ağır zərər vurma) maddəsi ilə ittiham ediblər.
Qeyd edək ki, N.Pənahlının atası dünyasını dəyişəndən sonra anası Sara Pənahlının da vəziyyəti pisləşib. S.Pənahlı yanvarın 22-də bronxopnevmoniya və plevrit diaqnozu ilə Respublika Klinik Xəstəxanasının reanimasiya şöbəsinə yerləşdirilib.
Dünən N.Pənahlının ailəsinə baş çəkdik. İşıqların gur yandığı koridordan sonra şam işığı ilə zəif işıqlandırılan mənzilə daxil olduq. N.Pənahlının həyat yoldaşı Həcər Pənahlı otaqları bir-bir bizə göstərdi. Mənzilin temperaturu normal otaq temperaturundan qat-qat aşağı idi. H.Pənahli dedi ki, qayınanasının da vəziyyəti elektrik enerjisi kəsiləndən sonra pisləşib: “Son günlər yediyini də qaytarırdı. Ayın 22-si yataqdan qalxa bilmədi. Ailə həkimimizi çağırdıq. Dedi, təcili reanimasiyaya yerləşdirmək lazımdır. Təcili tibbi yardım çağırdıq. Xərək gətirməmişdilər. Tibb bacısı dedi ki, qoluna girib birtəhər maşına aparmaq lazımdır. Bizə onu stula oturdub aşağı düşürməyi təklif etdilər. Qayınanamı yerdən qaldırıb bir az aparmışdılar ki, birdən xırıltılı səsi gəldi. Elə bildik öldü. Onu reanimasiyaya yerləşdirdilər”.
Həcər xanımın sözlərinə görə, S.Pənahlının vəziyyəti heç də yaxşı deyil: “ Reanimasiyaya xəstənin heç yaxınlarını da buraxmırlar. Həkimdən xahiş etdim ki, başımı qapıdan göstərim, qayınanam görsün ki, burdayıq. Ona qapıdan səsləndim. Məni tanımadı, heç reaksiya da vermədi”.
H.Pənahlı baş verənləri ailəsinə qarşı qəsd kimi qiymətləndirir: “Biz bu evə 1993-cü ildə köçmüşük. Mənzilin ilk sakinləri biz olmuşuq. Mənzilə köçəndən sonra məlum oldu ki, 1100 manat işıq borcumuz yaranıb. Nemət o vaxtdan işıq idarəsinin işçilərindən borcun silinməsini xahiş etmişdi. Fikirləşirəm ki, o borc bina təmir olunarkən elektrik aparatları istifadə olunanda yaranıb. Başqa izahı yoxdur. İndi də deyirlər ki, Nemət Pənahlının 2005-ci ildən bəri borcu yaranıb. Məbləğ böyük olduğundan silə bilmərik deyirlər. Nemət həbsdədir. Mən o qədər pulu haradan tapım verim?”
Müsahibimiz bildirdi ki, evdə ancaq mətbəx isti olur: “Duxovkanı yandırıb, qapağını açıq qoyuram. Gündəlik həyatımız mətbəxdə keçir. Uşaqlarım dərslərini mətbəxdə, şam işığında oxuyurlar”
H.Pənahlı dedi ki, bu məsələ ilə bağlı Prezident Aparatına da zəng edib: “Qafar müəllimlə danışdım. Bizə dedi ki, bu o qədər də böyük məbləğ deyil. Qafar müəllimlə sonra da əlaqə saxladım. Dedi ki, kart vursaq işıq veriləcək. Əlimdə olan pulu karta vurdum. O da köhnə borcdan çıxıldı. Hələ də bir nəticə yoxdur”.
H.Pənahlı hesab edir ki, hətta işıq borcunu ödəsələr belə, mənzilin suyunu kəsəcəklər: “Hər şeyi hesablamışam. Mən borca girib o məbləği tapıb ödəsəm, nə isə tapıb suyumu kəsəcəklər. Nemətin həbsindən bəri bütün hadisələri yazıb beynəlxalq təşkilatlara müraciət göndərmişəm”.
Məsələ ilə bağlı “Bakıeletrikşəbəkə” ASC-nin mətbuat xidmətinin rəhbəri Tanrıverdi Mustafayevlə danışdıq. T.Mustafayev bildirdi ki, borcla bağlı mübahisəli məqamlar yaranıbsa borclu abonentlər “Bakıelektrikşəbəkə”nin nəzdindəki şikayətlərin araşdırılması komissiyasına müraciət edə bilərlər: “Adətən alqı-satqı zamanı yeni sahibkar evin kommunal borclarının olmadığına dair arayış almalıdır. Həmin mənzilin sayğacında borc varsa, istənilən halda bu, həmin mənzilin borcu sayılır”.
İşıq borclarının silinməsi məsələsinə gəlincə, T.Mustafayev bildirdi ki, indiyədək abonentlərin ancaq qaz və su borcları silinib: “İşıq borcları heç vaxt silinməyib. Borcun hissə -hissə ödənilməsi üçün bizim rəhbərliyə müraciət etmək lazımdır. Bu barədə qərarı rəhbərlik verir”./Yeni Müsavat
