Fransa hökuməti bir qanuna imza ataraq qondarma erməni soyqırımı haqqında qanun layihəsini qəbul etdi. Senatın bu qərarı çox təəssüf ki, Türkiyə tərəfindən düzgün qiymətləndirilməyib. Əslində erməni genosidi deyilən hadisələrin baş verməsində Fransa Türkiyədən daha çox məsuliyyət daşıyır.
Belə ki, Birinci Dünya müharibəsində Antantanın üzvü olan Fransa digər Avropa ölkələri ilə birləşərək Türkiyənin ərazisinə keçərək fürsətdən istifadə edib Türkiyəni işğal etmək istəyirdi. Hətta yunanlarla birləşib Ankaraya 26 km yaxın məsafəyə qədər irəliləmişdilər. Ankaraya kimi Türkiyə torpaqlarının hamısı onların nəzarəti altına keçmişdi. Həmin dövrdə fransızlar Türkiyənin daxilində yaşayan ermənilərdən üsyançı vasitə kimi istifadə etmək istəyirdilər. Türkiyə də Antantadan özünü müdafiə etmək üçün öz daxilində baş qaldıran üsyanı yatırtmaq üçün üsyançı erməniləri neytrallaşdırdı. Üsyançı erməniləri öldürdükdən sonra yerdə qalan erməniləri Suriya ərazisinə evakuasiya etdilər.
Qeyd edək ki, birinci dünya müharibəsi zamanı Suriya və İraq ərazisi Türkiyənin idi. Müharibə zamanı Türkiyə Antantanı məğlub etdi. Ermənilər də Antantanın məğlub olduğunu gördükdən sonra, məcburi şəkildə Rusiyaya pənah aparmaq qərarına gəldilər. Rusiya onlardan Türkiyəyə qarşı mübarizə aparmaq şərti ilə Qafqazda dövlət quracağı haqqında vəd verdi.
Ondan sonra Andranikin rəhbərliyi altında üsyankar ermənilər Azərbaycan ərazisində kütləvi qırğınlar həyata keçirdilər. Türkiyə ordusu isə Azərbaycanı müdafiə etmək üçün sərhədələri keçərək ölkəmizin ərazisinə gəldilər. Beləliklə, Azərbaycanda olan qiyamçı ermənilərin hamısı məhv edildi.
Fransa, erməniləri soyqırıma təşviq edən ən əsas səbəbkarlardan biridir. Çünki Birinci Dünya müharibəsində fransızlar qarşılıqlı olaraq ermənilərlə müttəfiq idilər. Fransa soyqırımla bağlı atdığı addım buna görədir. Fransa vaxtı ilə erməniləri siyasi avantüraya sürüklədiyinə görə, bu gün soyqırım qanunu ilə ermənilərə mənəvi təzminat ödəyir. Nəyə görə başqa xalqlar soyqırımla bağlı hər hansı bir iş görmür, lakin Antantaya üzvü olan dövlətlər bunu edirlər? Çünki Antantaya üzv olan ölkələrə qarşı ermənilərin iddiası var. Əsl səbəb budur. Qanun layihəsini Sarkozinin prezidentliyi və digər məsələlərlə əlaqələndirmək olmaz. Türkiyə Birinci Dünya müharibəsində Fransanın Türkiyə ərazisinə daxil olması və ermənilərlə müttəfiqliyi nəticəsində ölkəyə dəymiş maddi və mənəvi ziyanın ödənilməsi ilə beynəlxalq məhkəməyə müraciət etməlidir.  
Türkiyə Fransanın onun ərazisinə hücum etməsi və orada yaşayan ermənilərlə müttəfiq olaraq Türkiyəyə vurduğu maddi və mənəvi ziyanın təzminatını ödəməlidir. İslam Konfransı Təşkilatı və bütün türk dövlətlərindən ibarət təcili toplantı keçirməli və bu dövlətlərin tərkibində Fransaya qarşı lazım olan addımlar atılmalıdır. Əgər fransızlar 100 il bundan qabaq müttəfiq olduğu dövləti müdafiə edirsə, Türkiyə də eyni ilə öz müttəfiqlərindən dəstək almalıdır. 

Sərdar Cəlaloğlu
Azərbaycan Demokrat Partiyasının sədri