Rəsmi Paris ermənilərə görə demokratiyanı çeynədi və türk düşmənliyinə imza ataraq qondarma “erməni “soyqırı”mı haqqında qanun layihəsini qəbul etdi. Hamı üçün maraqlı olan budur ki, bundan sonrakı hadisələrin axarı necə davam edəcək. Belə ki, Azərbaycan-Fransa, Fransa-Türkiyə, eyni halda Türkiyə-Azərbaycan münasibətləri və Azərbaycanın Türkiyəyə dəstək olması məsələsi necə olacaq? Mövzu ilə bağlı FaktXeber.com-a açıqlama verən ADP-nin sədr müavini Həsrət Rüstəmov Fransa tərəfindən atılan addımın Avropanın demokratik dəyərlərinə zidd olduğunu bildirdi: “Bir daha qeyd etmək lazımdır ki, bu qanun Fransa Parlamentinin və Sarkozi hökumətinin Avropanın demokratik dəyərlərinə ciddi hörmətsizliyini sübut etdi. Fransa Senatı bu qərarı ilə həm də mədəniyyətlər arası dialoqa böyük zərbə vurdu və təkcə Türkiyəni deyil, bütün müsəlman dünyasını məyus etdi. Nəticələrə gəldikdə isə, bu - tarixin rəsmi şəkildə saxtalaşdırılması aktı olan qanunun ən böyük mənfi təsiri məhz fransız xalqına dəyəcək.”

Türkiyənin Fransa ilə bütün siyasi və iqtisadi əlaqələrini zəiflədəcəyini qeyd edən Həsrət bəy, “bu qanunun qəbulu həmçinin Türkiyənin Avropa üçün nə qədər əhəmiyyətli olduğunu bir daha sübuta yetirəcək və Türkiyə rəsmilərinin ardıcıl ağıllı gedişlərindən çox şey asılı olacaq”, - deyə bildirdi: “Azərbaycanın və digər müsəlman ölkələrinin birmənalı olaraq Türkiyənin yanında olmasına ciddi ehtiyac var və elə hesab edirəm ki, bizim ölkəmiz Fransa ilə münasibətləri minimuma qədər endirməlidir. Bunu edib etməyəcəyini gələcək göstərəcək, amma etməsə Azərbaycan uduzacaq.”

Xəyal Şükür