FaktXeber.com xəbər verir ki, Azərbaycan Xalq Cəhbəsi Partiyasının (AXCP) sədri Əli Kərimli Fransa Senatında qondarma erməni soyqırımını inkar edənlərə qarşı cəzanı nəzərdə tutan qanunun qəbul edilməsi məsələsinə münasibət bildirib.

O, Salamnews-a bildirib ki, Fransa Senatının Konstitusiya komissiyasının və Hüquq komissiyasının sədrləri də bu qanunun Fransa Konstitusiyasına və demokratiyanın əsas prinsiplərinə zidd olmasını bəyan ediblər. "Şübhəsiz, bu qanunun qəbulu Fransa-Türkiyə və Fransa-Azərbaycan münasibətlərinə ciddi xələl gətirəcək. Çünki Fransa qanunvericiləri yüz il bundan əvvəl baş verən hadisələri tarixi saxtalaşdırmaqla özləri həqiqəti müəyyənləşdirərək belə absurd qanun qəbul ediblər", - deyə AXCP sədri bildirib.

Ə.Kərimli deyib: “İndiyə qədər dünyada belə bir qanun heç vaxt və heç kimə qarşı tədbiq olunmayıb. Bu mənada hesab edirəm ki, Fransa Senatı böyük səhvə yol verib. Azərbaycanda müxalifət olaraq biz də bu qanunun müzakirəsinin ilk mərhələsində öz prinsipial mövqeyimizi bildirmişik. Birmənalı şəkildə bəyan etmişik ki, Azərbaycan hökuməti bu məsələdə Türkiyə ilə birgə addımlar atmalıdır, Azərbaycan-Türkiyə Strateji Əməkdaşlıq Şurası toplanmalıdır, bütün Azərbaycan dövlət rəsmilər tərəfindən açıq şəkildə Fransanın nəzərinə çatdırılmalı idi ki, bu qanunun qəbulu Fransanın ATƏT-in Minsk qrupunda həmsədr kimi qalmasını mümkünsüz edəcək. Bu qanunun qəbul edilməsi Azərbaycan ilə Fransa arasında iqtisadi, siyasi, mədəni əlaqələrin zəifləməsinə, hətta bəzi sahələrdə münasibətlərin qırılmasına gətirib çıxaracaq. Çox təəssüf ki, bu məsələ ilə bağlı Azərbaycanın dövləti susdu. Gərək vaxtında Fransa tərəfinə gərəkli mesajlar veriləydi. İndi heç olmasa, təcili olaraq, Azərbaycan və Türkiyə Strateji Şurası toplanmalı və Fransa ilə münasibətlərdə ortaq qərarlar verilməlidir".

Onun sözlərinə görə, bu cür qərəzli qanunun qəbulundan sonra Azərbaycan xalqı tərəfsiz vasitəçi olaraq Fransanın indiki hakimiyyətini qəbul edə bilməyəcək. Bu qanunun qəbuluna Fransanın daxilində də çox ciddi etiraz göstərənlər var. Ona görə, bu, Fransa xalqı və dövləti ilə Azərbaycan və Türkiyə arasında yaranan problem deyil. Bu, Fransanın indiki hakimiyyəti ilə yaranan problemdir. İnanıram, Azərbaycan və Türkiyə, Fransanın daxilidəki həmin mütərəqqi qüvvələrlə işi davam etdirəcəklər ki, bu məsələ növbəti mərhələdə Konstitusiya Məhkəməsinin gündəliyinə salınsın və bu məsələyə orada baxılsın. Hətta, bu, mümkün olmadığı təqdirdə, Fransa cəmiyyətinin daxilində bu iş davam etdirilməlidir ki, Fransa tərəfi biabırçı qanundan imtina etsin.

AXCP sədri vurğulayıb: "O vaxta qədər Azərbaycan və Türkiyə hökumətlərinin mövqeyi bir olmalıdır, birgə etiraz bildirilməli və qərarlar qəbul edilməlidir. Fransa siyasətçiləri və diplomatları da başa düşməlidirlər ki, bu qanunu qəbul etməklə bir neçə yüz min erməninin mövqeyini mövcud hökumət müdafiə edirsə, bunun əvəzində Fransa üçün çox ciddi diplomatik və siyasi problemlər yaradır. Fransa tərəfi məsuliyyətli olsun və bu səhvi düzəltsin”.

Tural Həsənli