“Türkiyə NATO ölkəsi olduğu üçün köhnə rus stansiyasına ehtiyacı yoxdur. Güman etmirəm ki, mövcud elm və texnikanın fonunda Qəbələ RLS-in bir qiyməti ola bilər”. Politoloq Vəfa Quluzadə bu sözləri Qəbələ RLS-in Türkiyənin himayəsinə verilməsi ilə bağlı təklifləri şərh edərkən belə söylədi. Ekspert Qəbələ RLS mövzusunda Bakı ilə Ankara arasında məsləhətləşmələrin aparıldığını güman etmir.

“Çünki Azərbaycanla Türkiyənin strateji baxımdan o qədər də yaxın olduğunu demək olmaz. Hələlik biz iki dövlətik, ancaq bir mövqedən çıxış edən dövlətlər deyilik. Sözsüz ki, belə bir müzakirələr zəruri idi. Ancaq Azərbaycan hakimiyyəti öz gələcəyini harada, nə cür görür, bunlarla bağlı qəti mövqe olmalıdır, hələlik biz bunu hiss etmirik. Azərbaycan xalqının, ərazisinin maraqları baxımından dünyadakı sistemlərdə öz yerini düzgün tapmalıdır. Uzun müddət Rusiyanın koloniyası olduğu üçün Azərbaycanda rusmeyilli əhval-ruhiyyə güclüdür. Amma Azərbaycan tam müstəqil və Rusiyadan asılı olmayaraq milli maraqlarını təyin etmək iqtidarında olmalıdır, bu, çox önəmlidir”.
V.Quluzadə deyir ki, bu stansiyanın fəaliyyəti həm də Türkiyəyə qarşı yönəlib: “Ona görə də Qəbələ RLS-in bağlanması Türkiyənin maraqlarına uyğundur”. Yanvarın sonlarınadək artıq RLS-lə bağlı Bakı ilə Moskva arasında razılaşmanın əldə olunacağı barədə açıqlamalara gəldikdə, politoloqa görə, Rusiya ilə danışıqlara bu ölkədəki proseslərin inkişafı müstəvisindən yanaşmaq və müvafiq qərar vermək lazımdır: “Fevralın 4-də xalqın növbəti etirazları gözlənilir. Ondan sonra Rusiyadakı prezident seçkilərini gözləmək, ondan sonra qərar qəbul etmək gərəkdir”./"Yeni Müsavat"