Bir ay ərzində qondarma erməni soyqırımı ilə Fransa hökumətinin atdığı iki ziddiyyətli addım dünyada ictimaiyyət tərəfindən birmənalı qarşılanmadı. Bəzi ermənipərəst qüvvələrin bu məsələyə böyük dəstək nümayiş etdirmələrinə baxmayaraq, Senata göndərilən qanun layihəsi dünyanın əksər ölkələri tərəfindən etirazla qarşılandı.

Sarkozi hakimiyyətini bir ay ərzində Türkiyəyə qarşı atdığı iki ziddiyyətli addımı FaktXeber.com-a şərh edən Ədalət Partiyasının sədri, millət vəkili İlyas İsmayılov insanların fikir və düşüncələrinə görə orta əsrlərdə təqib və təzyiqlərə məruz qaldığını bildirdi: “Hələ orta əsrlərdən başlayaraq, Avropa filosofları bu təfəkkürə qarşı çıxaraq bildirdilər ki, insanları düşüncələrinə və fikirlərinə görə təqib etmək olmaz. İnsanları yalnız əməllərinə görə təqib edilə bilər. Sonralar filosofların fikirləri Avropa qanunvericiliyində öz əksini tapdı və insan hüquqlarının qorunması istiqamətində qüvvəyə mindi.”

Fransanın atdığı bu addımı ilə orta əsrlərdə olan özbaşınalıqları geriyə qaytarmaq istədiyini vurğulayan İlyas bəy, “Fransa tərəfindən atılan bu addım insan haqlarının qorunmasına qarşı yönəlib. Sarkozi Avropanın mərkəzində oturub tələb edir ki, Avropa standartlarına əməl edin”, - deyə bildirdi: “Sarkozinin atdığı bu addım Türkiyəyə qarşı olan münasibəti ilə əlaqədardır.  Türkiyənin Avropa İttifaqına daxil olmasının əleyhinə çıxan birinci ölkə Fransadır.”

Sarkozinin əvvəlki illərdən ermənilərə xidmət edən bir şəxs olduğunu qeyd edən İlyas İsmayılov, “1995-ci ildə milliyətcə erməni olan Eduard Ballador Fransada prezidentliyə namizədliyini irəli sürdüyü dövrdə Sarkozi onun seçki kampaniyasının sədri vəzifəsində çalışırdı”, - deyə qeyd etdi.”

Xəyal Şükür