Bu gün Sumqayıt Şəhər Məhkəməsində hakim Zeyqəm Huseynovun sədrliyi ilə Azərbaycan İslam Partiyasının sədr müavİni Arif Qəniyevin cinayət işinə dair məhkəmənin hazırlıq iclası keçirilib. Arif Qəniyevin vəkili Anar Qasımlının FaktXeber.com-a verdiyi  məlumata görə, məhkəmədə ilkin olaraq təqsirləndirilən şəxsin ittiham olunduğu maddələr elan edilərək, işlə bağlı tanışlıq prosesi keçirilib. Növbəti məhkəmə prosesi yanvar ayının 24-nə təyin olunub.  
 
Qeyd edək ki, 2011-ci ilin avqust ayında tutularaq Milli Təhlükəsizlik Nazirliyinin təcridxanasında saxlanan Arif Qəniyev Cinayət Məcəlləsinin 228.1 (Qanunsuz olaraq odlu silah, onun komplekt hissələrini, döyüş sursatı (yivsiz odlu ov silahı və həmin silah üçün döyüş sursatı istisna olmaqla), partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə) və 234.1-ci (Satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) maddələri ilə ittiham olunur.
Arif Qəniyevin istintaqı 2011-ci ilin sonlarında yekunlaşıb.