“Şərq-Qərb” Araşdırmalar mərkəzinin rəhbəri Ərəstun Oruclu şəxsi bloqunda “hakimiyyətin yeni Avropa projesi" adlı yazı yayımlayıb. Yazıda qeyd olunub ki, beynəlxalq dəstəkdən sürətlə məhrum olan Azərbaycan iqtidarı öz hakimiyyətini qorumaq üçün yeni texnologiya və üsullara əl atmaqda davam edir. Ərəstun bəy yeni üsul və texnologiya da müxalifətin qabiliyyətsizliyi, İranla əməkdaşlıq və Hacı İlqar faktoru kimi məsələlərdən istifadə olunacağını bildirib.
Məsələ ilə bağlı FaktXeber.com-a açıqlama verən Ərəstun Oruclu, hakimiyyətin bu proje ilə heç bir uğur əldə etməyəcəyini bildirdi: “Əvvəla onu qeyd edim ki, bu yazının 54-lərin müraciətinə heç bir aidiyyatı yoxdur. Eyni halda bu yazı mühacirətdə yaşayan azərbaycanlılarla da bağlı deyil. Son dövrdə Azərbaycanda öz marağını həyata keçirmək istəyən şəxslər var və ona görə də bu məsələləri ortalığa atmaq istəyirlər.”

Ölkədə olan bütün siyasi-ictimai proseslərin hakimiyyətin nəzarəti altında olduğunu qeyd edən Ə.Oruclu, “təbii ki, belə olan halda kimlər bu cür prosesləri mütəşəkkil formada həyata keçirə bilər. Düzünü desəm mən bu məsələyə bir az şübhə ilə yanaşıram. Qəbul etmirəm ki, bu məsələlər kiminsə təşəbbüsüdür”, -deyə bildirib: “Əlbəttə ki, səmimi olaraq ateist baxışlı şəxsləri bu məsələlərə qatmıram. Amma eyni zamanda bu cərəyanlara qoşulan və özünü ateist kimi təqdim edən insanlar da vardır ki, həmin şəxslər bir çox maraqlarının üst-üstə düşməsindən istifadə edərək öz niyyətlərini də ortalığa qoyurlar.”

Hakimiyyətdə olan bəzi qrupların ölkədə dini qarşıdurma görüntüsü yaratmaq istədiyini söyləyən Ərəstun bəy, bununla ölkədə din təhlükəsi olduğunu göstərmək istədiklərini qeyd etdi: “Bunun özü köhnə bir texnologiyadır. Sadəcə olaraq bu texnologiyanın mexanizmləri yenidir. Yeni proje işləməyəcək. Ona görə ki, əgər bu addım Avropa və ABŞ-a hesablanmış strategiyadırsa, onda Qərbin bu məsələlərdə olan mövqeyinə baxmaq lazımdır. Qərb strategiyasında hər hansı bir anti-din proses tapmaq çətindir. Hazırda ölkənin dini kəsimlə hər hansı bir qarşıdurma yaratmaq cəhdləri müşahidə olunur. Yazdığım blok yazısı müəyyən əsas və məlumatlara söykənir. Kimlərsə ölkədən getmək və ya sığınacaq almaq istəyirsə ölkəni qarışdırmasın. Onsuzda qarışdıra bilməyəcəklər. Həmin insanların ictimai çəkisi buna yol verməyəcək.”              

“Bu məsələdə niyə məhz dini kəsim seçildi”, - sualına da aydınlıq gətirən Ərəstun bəy, “dini kəsim öz əqidələrinə qarşı çox həssasdırlar. Dini kəsimi rahat formada xarici qüvvələrlə bağlamaq mümkündür. Xüsusilə bu proses İran ətrafında gərginliyin artdığı bir dövrə təsadüf edir”, - deyə cavablandırdı.

Eyni zamanda bu məsələdə müxalifət amilinin də dərc olunduğunu qeyd edən Ərəstun Oruclu, “məlumdur ki, Hacı İlqar İbrahimoğlu konkret olaraq İctimai Palatanın Koordinasiya Şurasının üzvü olaraq son seçkilərdə ən yüksək səs toplayan şəxslərdən biridir. Çox qəribədir bu amildən istifadə edərək İP-nı nəticə etibarı ilə aparıb din ilə bağlayırlar”, - deyə qeyd etdi: “İP kollektiv şəkildə İlqar İbrahimoğluna səs verdilər. İndi yeganə olaraq İlqar İbrahimoğlunu qaralamaq qalıb. İlqar İbrahimoğlu amilindən istifadə edərək İP-nı aparıb İrana bağlamaq cəhdi müşahidə olunur. Yazımın da əsas məqsədi insanları bu tendensiyalardan çəkindirməkdir.”