Demokratik Cəmiyyət Uğrunda Müqavimət Hərəkatın rəhbəri Rəsul Quliyev növbəti dəfə İP ilə bağlı fikirlərini açıqlayaraq bildirib ki, İctimai Palata bizim təbii müttəfiqimizdir. R.Quliyev qeyd edib ki, İctimai Palata konsensusla işləyən təşkilat olduğundan, fəaliyyətində bir sıra problemlər meydana çıxa bilir: İctimai Palatada qərar verib, icra etmək problemdir.

“İP-da verilən qərarların icra edilməsində hər hansı bir problemlər mövcuddurmu”, - sualı ilə bağlı FaktXeber.com-a açıqlama verən Müsavat Partiyasının başqan müavini Gülağa Aslanlı, indiyə qədər İP tərəfindən verilən bütün qərarların hamısının həyata keçirildiyini bildirdi: “Qərarlar konsensusla qəbul edilsə belə, bütün qərarların hamısı icra olunur. İP-nın indiyə qədər icra olunmamış hər hansı bir qərarı mövcud deyil.”

İlin əvvəllərindən etibarən İP-nın əleyhinə başlayan kampaniyanı da şərh edən başqan müavini, “İP-nın güc mərkəzi olduğunu gördükdən sonra bəzi qüvvələrin təzyiqləri artırması təbii haldır. İP gücləndikcə cəmiyyət ictimai proseslərdə fəaliyyətini daha da artırır”, - deyə bildirdi: “Aktiv ictimaiyyət nümayəndələri içərisində bu prosesləri İP daxilində aparmaq istəyən və ya müstəqil olaraq fəaliyyət göstərmək istəyənlər də mövcuddur. Lakin yeni yaranmış təşkilatların hələ ki, güclənməsinə ehtiyac var. Həmin təşkilatlar işlərində dönüş yaratdıqdan sonra biz bu məsələləri onlarla müzakirə edəcəyik.”